DILI, 08 jullu 2020 (TATOLI)-Ministra Saúde, Odete Maria Freitas Belo, hateten daudaun ne’e simu ona informasaun kona-ba kazu má pratika ne’ebé deskonfia komete husi profisionál saúde hodi rezulta pasiente ida mate iha Ospitál Referál Eduardu Ximenes Baucau.
”Ami simu ona informasaun katak tebes kazu má pratika iha Munisípiu Baucau maibé presiza mós relatóriu formál ida atu nune’e ha’u bele hateten ba ita boot sira,” dehan Ministra Saúde ba Jornalista sira iha Palacio do Governo, kuarta ne’e.
Mate-isin oras ne’e evakua ona mai Ospitál Nasionál Guido Valadares (HNGV-sigla portugés) hodi hala’o autopsia para bele hatene loloos motivu husi matebian nia mate.
”Normalmente kazu hanesan ne’e tenki lori mai iha Ospitál Nasionál Guido Valadares hodi halo autopsia maibé, depende ba família sira ita timor dalabarak akontese hanesan ne’e balun lakohi autopsia maibé ha’u espera katak família aseita para bele halo autopsia,” katak Odete.
Nia dehan rejultadu autopsia maka sei justitifka loloos kauza husi matebian ninia mate tanba ne’e maka Ministériu Saúde sei hein rejultadu autopsia refere.
Eis Diretora Ezekutiva SAMES ne’e, afirma bainhira akontese duni kazu má pratika entaun tenki submete lei ne’ebé maka vigora iha TL.
“Atu hasai médiku ka la hasai ne’e Ministeriu Saúde tenki haree prosesu sira ne’e,”katak Ministra Odete Maria Freitas Belo.
Jornalista : Felicidade Ximenes
Editór : Agapito dos Santos
