DILI, 10 jullu 2020 (TATOLI) – Ministériu Finansa (MF) liuhosi Autoridade Tributária Timor-Leste (ATTL) lansa aplikasaun E-Request ba tratamentu sertidaun dívida via online atu hamenus burokrasia no kustu operasionál husi aplikante sira.
Aplikasaun E-Request nu’udar parte ida hosi E-Services ne’ebé lansa ona iha tinan 2019 liubá, ne’ebé ho aplikasaun E-Request ne’e kontribuente sira bele ona halo submisaun ba sira-nia pedidu hodi trata sertidaun dívida iha fatin ne’ebé de’it bainhira sira iha koneksaun ba liña internet.
Hafoin manda submisaun, kontribuente sei simu mensajen husi ATTL bainhira pedidu ba aplikasaun sertidaun dívida nia verifikadu ona no aprovadu.
Diretora Jerál ATTL, Mónica Rangel da Cruz esplika lansamentu ba aplikasaun Feature E-Request ba sertidaun dívida online ne’e nu’udar parte integradu ida husi plataforma ATTL atu fasilita kontribuente sira hotu hodi halo aplikasaun ba sertidaun divída.
“Ita-nia autoridade ne’e harii dezde 2000 to’o 2020 ne’e uza prosesu manuál de’it, tanba ne’e E-Request ne’e ho efisiésia no efikásia atubele minimiza burokrasia no kustu operasionál hodi fasilita di’ak liután ba ita-nia kontribuente no emprezáriu sira la presiza ona hakat fízikamente mai edifísiu maibé iha fatin ne’ebé de’it iha liña internet iha bele halo aplikasaun,” tenik Dirijente ne’e iha salaun Ministériu Finansa, Aitarak Laran, sesta ne’e.
Maski nune’e, Diretora Jerál ne’e dehan sistema manuál ba atendimentu sertidaun dívida ne’e sei kontinua loke ba sira ne’ebé difikuldade ba internet.
“Ami sei halo implementasaun aplikasaun E-Request hahú iha fulan oin bainhira tékniku sira finaliza,” Diretór Mônica akresenta.
Iha sorin seluk, Vise-Ministra Finansa, Sara Lobo Brites, iha ninia diskursu konsidera lansamentu ba aplikasaun foun ne’e nu’udar pasu markante ida iha ámbitu programa reforma fiskál ne’ebé Autoridade Tributaria alkansa hodi halo melloramentu ba atendimentu ba públiku.
“Aplikasaun ne’e atu hafasil Autoridade Tributária halo rekadasaun ba kontribuente sira hodi aumenta reseita doméstika hodi fó sustentabilidade fiskál iha futuru dezenvolvimentu Timor-Leste,” nia subliña.
Nia dehan, objetivu prinsipál husi reforma fiskál mak Autoridade Trbutária sai kredível, hetan fiar no respeitu husi sidadaun sira hotu, liuliu hadi’a atendimentu ba kliente ho forma ida rigór, efisiente no efikásia bainhira halo knaar rekolla reseita ba Estadu.
Ho nune’e, Governante ne’e agradese no orgullu tebes ba esforsu ATTL hodi kria aplikasaun E-Request hodi fasilita kontribuente sira-nia pedidu submisaun no rekerimentu ba sertidaun dívida.
Partisipa direita ba lansamentu aplikasaun ne’e, Vise-Prezidente Banku Sentrál Timor Leste, Diretór Jerál SERVE, Diretór Jerál TradeInvest, reprezenta Banku Komersiál sira, reprezentante TIC, kontribuente sira, emprezáriu sira no asesór MF inklui konvidadu seluk.
Jornalista: Florênncio Miranda Ximenes
Editora: Julia Chatarina
