Komisaun A Sei Aprezenta Relatóriu no Pareser MPCC Ba PPN

DILI, 10 jullu 2020 (TATOLI)—Prezidente Komisaun A (Justisa no Konstitusionál), Deputadu Joaquim dos Santos, sei aprezenta relatóriu no pareser kona-ba projetu lei Medida Prevensaun no Kombate Korrupsaun (MPCC-sigla portugés) ba Prezidente Parlamentu Nasionál.
Projetu lei Medida Prevensaun no Kombate Korrupsaun (MPKK) ne’e muda hosi títulu Lei Antí Corrupsaun (LAC).
Notísia Relevante: Komisaun A Konklui Ona LAC, Aban Hatama Relatóriu Finál ba PN
“Ami aprova ona artigu 120, proposta ne’e foun iha artigu 20-resin de’it, horisehik ami aprova mós relatóriu no pareser iha faze espesialidade ne’e. Ohin, ha’u sei ba nota enkamiñamentu no haruka kedas ba Parlamentu Nasionál,” Prezidente Komisaun A (Justisa no Konstitusionál), Deputadu Joaquim dos Santos, informa ba jornalista sira, iha resintu Parlamentu Nasionál, sesta ne’e.
Deputadu Joaquim dos Santos, akresenta Komisaun A aprezenta de’it ba Parlamentu Nasionál, atu lori ba plenária ne’e depende ba Prezidente Parlamentu Nasionál.
“Ami-nia komisaun halo servisu hotu ona hein aprezenta relatóriu no pareser aprezenta ba prezidente parlamentu tanba tuir lei ne’e prezidente mak uza nia kompeténsia,” nia dehan.
Notísia Relevante: Títulu Foun Projetu Lei Númeru 1/V/I Refleta Konteúdu Tomak
Jornalista : Evaristo Soares Martins
Editór : Cancio Ximenes

