DILI, 11 jullu 2020 (TATOLI)-Sekretáriu Estadu Juventude no Desportu (SEJD) hamutuk ho kargu Xefia no Funsioáriu sira iha Nivel Nasionál, sesta ne’e lakon ninia funsionáriu Alvarito Rodrigues Alvares, ne’ebé maka durante ne’e servisu iha SEJD Munisípiu Lautem tanba sofre moras komplikadu hodi hakotu iis.
Matebian hahú servisu nu’udar funsionáriu SEJD Munisípiu Lautem iha tinan 2014 ho ninia responsabilidade maka implementa no hatutan programa SEJD nian iha nivél munisípiu ho supervizaun emidiatu husi Xefe Departementu Rekursu Umanu SEJD nian.
Sekretáriu Estadu Juventude no Desportu, Abrão Saldanha, dehan simu notísia tristeza ne’e bainhira dirije hela enkontru ida ho dirijentes SEJD nian iha sala reuniaun Licidere sesta horiseik.
“Ha’u lidera hela enkontru ho dirijente sira hotu SEJD nian ho partisipasaun husi Diretór Jerál sira, Diretór Nasionál, Xefe Unidade no Xefe Departamentu sira hotu bainhira simu notísia triste ida ne’e, no ha’u fahe kedas notísia tristeza ne’e ba SEJD tomak,” katak Governante liuhosi komunikadu imprensa ne’ebé maka TATOLI asesu iha sábadu ne’e.
Governante dehan sente lakon funsionáriu ho kapasidade di’ak ida atu kontribui ba dezenvolvimentu instituisaun liliu dezenvolve desportu iha Timor-Leste.
“Ami lakon funsionáriu ida ne’ebé sei bele kontribui buat barak liután atu presta serbisu ba ita-nia joven sira no ba ita-nia desportu,”tenik Abrão.
Nia hateten reprezenta instituisaun, kargu xefia no funsionáriu, Komisaun Nasionál Desportu, Komisaun Reguladora Arte Marsiál no seluk tan hato’o sentidu kondolensia profunda ba fámilia enlutada.
“Pesoalmente, ha’u triste tanba foin horiseik mak hasai intrusaun ba marka enkontru ida iha fulan-Jullu ne’e nia rohan atu hasoru malu ho SEJD nia funsionáriu munisípiu sira hotu, inklui Alvarito husi Lautem, maibé seidauk hasoru malu, Nai Maromak bolu hikas tiha ona Alvarito,” katak Sekretáriu Estadu.
SEJD daudaun ne’e fó ona orientasaun ba servisu tékniku sira hodi fó apoiu materiál no finansiál balun ba serimonia funebre isin-mate matebian Alvarito Rodrigues Alvares. Aleinde ne’e SEJD Dili sei orgniza misa requem ba matebian iha Dili.
Jornalista : Hortencio Sanchez
Editór : Agapito dos Santos
