DILI, 14 jullu 2020 (TATOLI) – Tuir dadus ne’ebé fó sai hosi Banco Central Timor-Leste (BCTL), hahú hosi 2014 hatudu katak durante ne’e ema sira ne’ebé asesu ba kréditu iha banku maioria iha setór konstrusaun kompara ho setór produtivu sira hanesan agrikultura no turizmu.
“Dadus Banco Central hatudu iha marsu 2020, kréditu iha setór kontrusaun ba individu no setór finanseiru. Setór rua mak ha’u haree hanesan produtivu tebes maibé interese ladún boot iha setór agrikultura no turizmu,” tenik Vise-Governadór BCTL, Venâncio Maria Alves iha aprezentasaun ho tópiku Vizaun no Polítika iha ámbitu Rekuperasaun Ekonómia iha semináriu ne’ebé organiza hosi Komisaun Funsaun Públika iha salaun Ministériu Finansa, Aitarak-Laran, tersa ne’e.
Vise-Governadór BCTL, hateten durante ne’e banku fó kréditu ba individu barak liu tanba sente seguru, liuhosi funsionáriu públiku, funsionáriu permanente iha setór privadu sira ho kontratu longu prazu.
Nia dehan, totál aplikante husi kompañia kréditu tun porsentu 58,5 ho valór kréditu tun porsentu 24 iha 2018 kompara ho 2017 tanba kauza husi rejime duodésimu.
“Nível apropasaun banku ninian pursentu 58 ne’e katak aplikante sira ne’ebé mak tama aplika kréditu ne’e banku kuaze aprova hotu ho valór mais ou menus pursentu 22, haree de’it ba tinan 2017 ba 2018 maibé ho krize COVID-19 bele aumenta situasaun ne’e piór liu,” nia akresenta.
Nia nota, situasaun iha merkadu kréditu iha preokupasaun barak katak ita iha difikuldade asesu ba kréditu, dalaruma tanba kustu operasionál.
Tuir Vise-Governadór katak situasaun iha merkadu kréditu iha preokupasaun barak katak iha difikuldade asesu ba kréditu, dalaruma tanba kustu operasionál no prémiu risku banku nian a’as no menus kolaterál ne’ebé adukuadu tanba banku hatene la’ós instituisaun karidade tanba banku nu’udár negósiu ne’ebé halo buat ruma presiza hetan lukru.
“Iha ha’u-nia haree karik ita mellora enkuadramentu legál balun hodi suporta estabelesementu kolaterál ba kréditu no mellora sistema judisiáriu ba ezekusaun kontraktuál ka sujestaun banku sira nian.
Negósiu dalabarak la investe adekuadu iha poténsia setór produtivu sira ka merkadu foun no kontinua dependénsia maka’as ba programa ka projetu Governu nian.
Governu liuhosi BCTL implementa ona sistema garantia kréditu ba empreza ki’ik no médiu ho nia jurus porsentu 7,5, másimu montante ba empreza ida bele kréditu mak $150.000.
Jornalista: Antónia Gusmão
Editora: Julia Chatarina
