DILI, 14 jullu 2020 (TATOLI)-Komandante Polisia Nasionál Timor-Leste (PNTL) Munisípiu Dili, Superintendente Xefe, Hendrique da Costa, hateten Komandu Dili sei kontinua enfreta limtasaun rekursu umanu atu asegura seguransa iha fatin hotu iha Kapitál Dili.
Nia esplika Komandu PNTL Munisípiu Dili iha membru polisia hamutuk ema na’in 500, husi númeru ne’e labele kobre iha área hotu-hotu iha Dili.
“Ha’u sente duni ho de’it membru 500 iha Kapitál Dili ita labele kobre seguransa tomak, tanba husi estatístika krime nian hatudu iha tinan ida ne’e hahú husi janeiro to’o agora ita rejista kazu hamutuk 700-resin, ida ne’e la inklui fulan tolu estadu emerjénsia ita la rejista,” dehan Nia iha UNTL Dili, tersa ne’e.
Tuir nia tinan hirak antes ne’e PNTL Dili rejista kazu krime to’o 2.000-resin kompara ho tinan ida foin mak rejista 700.
“Kazu iha Dili sa’e makaas tanba konsidera fatin konsentradu ema barak,”tenik Hendrique.
Ho limitasaun rekursu umanu maka afeta ba servisu operasionál liliu halo atuasaun ba kazu krime sira iha Dili.
Atu prevene númeru krime organizadu sira, nia dehan daudaun ne’e halo ona sorumutu ho Veteranus, Igreja, Universidade no seluk tan hodi husu apoiu atu kombate kazu krime sira iha futuru.
“Ha’u hatene husi fatin hirak ha’u tama ne’e iha oportunidade bo’ot atu ajuda polisia hodi kombate krime, tanba hahalok sira ne’e mosu mai husi problema sosiál,”nia hateten.
Jornalista : Tomé Amado
Editór : Agapito dos Santos
