DILI, 15 jullu 2020 (TATOLI)—Prezidente Parlamentu Nasionál, Deputadu Aniceto Longuinhos Guterres Lopes, hateten serimónia hatuur-hikas meza prezidénsia seidauk serteza tanba deputadu sira-nian sei hahú resesu iha 31 jullu 2020 no sesaun lejizlativa sei hahú fali iha 15 setembru.
“Meza foun, meza sei halo hela. Meza seidauk hotu entaun data ne’ebé marka tiha ona sei altera tán. Seidauk iha serteza,” Aniceto Guterres informa ba jornalista sira, iha resintu Parlamentu Nasionál, kuarta ne’e.
Notísia Relevante: Serimónia Hatuur-Hikas Meza PN Sei Realiza iha 30 Agostu
Antes ne’e, Prezidente Parlamentu Nasionál, Aniceto Guterres, fó-sai katak serimíonia hatuur-hikas meza Parlamentu Nasionál ne’ebé rahun sei realiza iha loron Konsulta Populár iha 30 de agostu.
“Ami sei ko’alia hela tanba tempu sei kleur. Ha’u informa tiha ona ba Arcebispo katak data fiksu hosi Parlamentu Nasionál nian mak dia 30 de agostu. Se laiha sirkutánsia ruma mosu impede entaun ita nafatin data ida-ne’e tanba koñesidu ho dia 30 de agostu loron konsulta populár ka loron povu nian,” dehan nia ba jornalista sira, iha edifísiu Episkopál, Lecidere, kuarta ne’e.
Iha momentu ne’e, Prezidente Parlamentu Nasionál, fó-sai katak oras ne’e parte tékniku sira sei konitnua deskute programa kona-ba hatuur-hikas meza parlamentu ne’ebé rahun ne’e.
Ho resesu ne’ebé hahú hosi 31 jullu 2020 no hahú fali sesaun lejizlativa iha 15 setembru, Deputadu Aniceto Guterres, esklarese sei halo alterasaun data ne’ebé fiksa tiha ona.
Notísia Relevante: Deputadu CNRT Baku-Fila Meza Prezidente Parlamentu Nasionál
Jornalista : Evaristo Soares Martins
Editór : Cancio Ximenes
