iklan

NASIONÁL, DEFEZA, HEADLINE

Governu Estabelese Ona Sistema Autoridade Marítima

Governu Estabelese Ona Sistema Autoridade Marítima

Primeiru-Ministru, Taur Matan Ruak prezide reuniaun Konsellu Ministru, iha Palásiu Governu, kuarta (15/07), Palásiu Governu. Imajen Tatoli/Egas Cristovão

DILI, 15 jullu 2020 (TATOLI) – Governu liuhosi desizaun Konsellu Ministru (KM) iha kuarta ne’e aprova ona projetu Dekretu-Lei ne’ebé aprezenta hosi Ministru Defeza, Filomeno da Paixão de Jesus, kona-ba Sistema Autoridade Marítima (SAM).

Ministru Prezidénsia Konsellu Ministru, Fidelis Manuel Leite Magalhães relata sistema ne’e hakarak afirma soberania nasionál no projeta Estadu nia autoridade iha tasi ne’ebé sujeita ba jurizdisaun Timór nian.

Iha fatin hanesan bele estabelese ona iha ‘Estudu Forsa 2020’ iha Planu Estratéjiku Dezenvolvimentu Nasionál (PEDN) 2011-2030 no mós iha Konseitu Estratéjiku ba Defeza no Seguransa Nasionál ne’ebé daudaun ne’e vigora hela.

“Governu aprova kriasaun Sistema Autoridade Marítima nu’udar kuadru institusionál atu halo koordenasaun ho entidade sira hanesan órgaun ka servisu sira iha nível sentrál no perifériku ne’ebé ho funsaun halo koordenasaun ho ezekutivu, konsultivu ka polisiál, hodi ezerse podér autoridade Estadu kona-ba espasu marítimu ne’ebé sujeita ba soberania no jurizdisaun nasionál,” dehan Ministru Fidelis hafoin reuniaun ezekutivu iha Palásiu Governu.

Ho dekretu-lei ne’e sei kria mós Autoridade Marítima Nasionál (AMN) no Xefe Estadu Maiór Jenerál hosi Forsa Armada maka sei kaer rasik knaar ne’e.

Nune’e mós, sei kria mós Diresaun Autoridade Marítima no ninia servisu sira ne’ebé ho kompeténsia iha ámbitu SAM.

Jornalista: Antónia Gusmão

Editora: Julia Chatarina

 

iklan
iklan

Leave a Reply

iklan
error: Content is protected !!