DILI, 15 jullu 2020 (TATOLI)-Jogadór ho Nasionalidade Brazileiru, Fabio Christian Cotinho, optimista sei lori Klube Lalenok United FC hetan vitoria iha Kopa Federasaun Futeból Timor-Leste iha fulan-agostu tinan ne’e.
“Lalenok preparadu ona ha’u ho kolega jogadór seluk ami treinu hamutuk di’ak tebes fiar katak ami sei lori ekipa ne’e susesu,” informa Eis Jogadór Klube Atletico Ultramar ne’e ba Tatoli, via mídia sosiál facebook, kuarta ne’e.
Jogadór avansadu ho númeru kamizola 93 husi klube Lalenok ne’e afirma atu lori klube ne’e hodi hetan kampiaun durante Kopa FFTL ne’e, la’ós fasil tanba ne’e presiza treinu maka’as no servisu ekipa.
Entretantu, Jogadór husi nasaun ko’alia lian portugés ne’e mai iha Timor-Leste iha tinan 2016 hodi reforsa iha klube Atletico Ultramar no konsege promove hosi segundu divizaun ba Primeriu Divizaun Liga Futeból Amadora (LFA) iha 2017.
Ho ninia prezensa iha Atletico Ultramar mós lori klube ne’e sai kampiaun dala rua tutuir malu iha taxa 12 de novembru 2017 no 2018.
Husi prestasaun ne’ebé maka iha halo klube Lalenok United iha tinan 2019 tenki kontrata nia hodi reforsa klube ne’e no lori klube ne’e hetan vitoria iha Liga Futeból Amadora époka 2019 no Taxa 12 de Novembru no mós super taxa durante tinan 2019.
Durante joga iha TL, jogadór estranjeiru ne’e konsege marka titlu hamutuk hitu hodi marka ninia istoria iha mundu futeból.
Jornalista : Hortencio Sanchez
Editór : Agapito dos Santos
