DILI, 14 jullu 2020 (TATOLI)-Prezidente Klube Academica FC, Gil da Conceição, hateten klube ne’ebé nia lidera prontu atu kompete ho klube seluk iha eventu Kopa Federasaun Futeból Timor-Leste iha fulan-agostu 2020 ne’ebé sei hala’o iha Dili.
“Academica sempre prontu para kompete iha atividade futeból rai-laran nian,” dehan Gil ba Tatoli via mídia sosiál facebook ohin.
Notísia Relevante :Académica FC Sei Halo Preparasaun ba Époka 2020 Hafoin Kongresu LFA Ramata
Nia informa oras ne’e hahú halo ona selesaun ba jogadór Timoroan sira hodi reforsa klube ne’e atu kompete iha Kopa FFTL.
“Ami halo hela selesaun ba jogadór agora lokál de’it hamutuk ema na’in 18 to’o 20,” katak nia.
Gil hateten iha eventu tinan ne’e, sira laiha planu atu kontratu jogadór estranjeiru hodi mai reforsa klube ne’e.
Entretantu, Academica hanesan klube ne’ebé hamahan iha Liga Futeból Amadora (LFA), klube ne’e degrada ona ba Segundu Divizaun Liga Futeból Amadora iha jogu époka 2019 liubá.
Maske degrada iha jogu LFA époka 2019, ekipa jogadór husi Universidade Nasionál Timor Lorosa’e ne’e la rende hodi kompete nafatin iha atividade futeból nasionál hotu.
Jornalista : Hortencio Sanchez
Editór : Agapito dos Santos
