DILI, 16 jullu 2020 (TATOLI)-Embaixadór Japaun ba Timor-Leste, Kinefuchi Masami, hateten patrosinu ba Empreza forñesidór enerjia Osaka Gas Foundation Of International Cultural Excange (OGFICE) Japaun iha ona alvu atu kompleta programa bolsa estudu ba estudante Fakuldade Enjinaria Siénsia no Teknolojia UNTL to’o ema na’in 200 antes 2020 ramata.
“Desde OGFICA apoiu bolsa estudu ba estudante selesianu UNTL iha 2013 to’o ínisiu fulan ne’e iha ona estudante selesionadu na’in 170 mak hetan ona bolsa estudu, alvu OGFICE nian molok tinan ne’e ramata tenki iha onaestudante 200,”dehan nia iha Salaun Fakuldade Enjinaria Siénsia no Teknolojia UNTL, Hera kuarta ne’e.
Diplomata ne’e dehan benefisiáriu ba programa bolsa estudu ne’e tenki liuhosi prosesu selesaun ida kompetetivu.
“Se mak hetan valór di’ak, nia mak iha diretu hetan apoiu bolsa estudu husi OGFICE, ne’e duni iha tinan ida ne’e kada departementu aumenta tan ba ema na’in 30 ida ne’e kompetetivu duni,”tenik tan.
Entretantu, iha kuarta ne’e, estudante Na’in 30 husi Universidade Nasionál Timor Lorosa’e (UNTL), hetan bolsa estudu husi Osaka Gas Foundation Of International Cultural Exchange (OGFICE) Japaun ho orsamentu $ 15.000 durante tinan ida no kada benefisiáriu simu $ 500.
Magnífiku Reitór UNTL, Francisco Miguel Martins, informa estudante hirak ne’e selesionadu husi Departementu lima hanesan Geology and Petroleum na’in neen, Informatic Engineering na’in neen, Civil Engineering na’in neen, Electrical Engineering na’in neen no Mecanical Engineering na’in neen.
“Estudante selesionadu sira ne’e foti husi semester III to’o IX ho valór IP minimu 2,94 ba leten. Bolsu estudu ne’e oferese husi OGFICE ho intensaun atu promove liután interkambiu internasionál liuhusi edukasaun iha Timor-Leste no nasaun seluk iha Sudeste Aziatíku atu hari’i amizade no parseria ida forte liután entre Japaun no Timor-Leste no nasaun sira seluk iha futuru,” dehan Reitór UNTL ne’e ba jornalista sira iha Hera, kuarta horiseik.
Nia dehan OGFICE komesa oferese programa bolsa estudu ba estudante Fakuldade Enjinaria Siénsia no Teknolojia (FEST) UNTL na’in 20 iha tinan 2012 ho osan $ 10.000.
No iha dezembru 2016 UNTL, JICA no OGFICE revee MoU ne’e hodi aumenta benefisiáriu husi na’in 20 ba to’o na’in 30. OGFICE deside fundu ba programa ne’e ho osan $ 15.000 hahú husi 2017 to’o 2020.
Jornalista : Tomé Amado
Editór : Agapito dos Santos
