DILI, 17 jullu 2020 (TATOLI) – Ministru Agrikultura no Peska, Pedro Reis, hateten iha tinan-2020 nia-laran parte Ministériu Agrikultura no Peska (MAP), liuhosi observasaun satélit identifika ró ilegál balun tama Tasi Timór hodi halo peska ilegál maibé seidauk halo kalkulasaun ikan hira maka lakon.
“Hosi fulan janeiru to’o jullu 2020 ita identifika katak ró ilegál 10 maka tama mai halo peska ilegál maibé seidauk halo kálkulu ikan tonelada hira maka lakon,” tenik Ministru Pedro, iha Suai Room, Timor Plaza, sesta ne’e.
Governante ne’e dehan, ró ilegál kontinua tama nafatin mai hodi halo peska ilegál iha Tasi Timór tanba Governu sei menus fasilidade atu kontrola.
“Ita-nia frakeza maka seidauk iha fasilidade ne’ebé bele ajuda ita atu halo kontrola ita-nia fronteira tasi,” nia subliña.
Nia informa, daudaun ne’e Governu Timor-Leste ho Governu Austrália iha ona kooperasaun atu konstroe ró rua hodi suporta servisu komponente navál ne’ebé ho kapasidade boot oituan hodi bele halo kontrolu iha Tasi Timór no tuir planu ró ne’e tinan-2023 maka sei entrega ba Timor-Leste.
“Ami hein katak ró rua ne’e bele to’o mai, nune’e ami bele servisu hamutuk ho entidade relevante sira hanesan komponenete navál ho Polísia Marítima hodi halo kooperasaun kontrola ba ita-nia tasi. Ró rua ne’e agora daudaun iha faze prosesu konstrusaun,” nia akresenta.
Antes ne’e, tuir observasaun hosi satélite hatudu katak ró ilegál ne’ebé tama Tasi Timór hodi halo peska ilegál hahú hosi 2018 to’o 2019 hamutuk unidade 174.
“Peska ilegál iha ita-nia tasi liu-liu iha parte sul, bainhira ita halo estimasaun ba ikan ne’ebé lakon ne’e hamutuk tonelada 155.000 no konverte ba osan hamutuk millaun $8,6,” Pedro Reis realsa.
Jornalista: Antónia Gusmão
Editora: Julia Chatarina
