DILI, 22 jullu 2020 (TATOLI)-Tuir dadus estatístika husi Klínika Bairru-Pité Dili fó sai durante fulan-janeiru to’o juñu ne’e rejista ona kazu má nutrisaun hamutuk 98 maioria afeta husi labarik kiik.
Jestór Klínika Bairru-Pité, Inácio dos Santos, hateten nia parte la aplika baixa ba pasiente ho problema má nutrisaun, maibé profisionál saúde sempre halo akompañamentu no konsulta ba pasiente sira kada semana.
Notísia Relevante :Labarik Menus Husi Tinan Lima 24% Sei Sofre Má-Nutrisaun
“Ami lahalo tratamentu, maibé ami halo internamentu signifika sira la baixa iha ami-nia fatin maibé sira mai konsulta de’it ba ami nia nutrisista sira kada semana entaun sira ne’ebé mak laiha kbi’it atu mai konsulta iha ne’e,profisionál saúde sira mak bá de’it sira nia hela fatin hodi fo atendimentu,”informa Jestór Klínika, Inácio ba jornalista sira iha ninia servisu fatin, kuarta ne’e.
Nia esplika dalabarak akontese inan balun kous bebe seidauk to’o tinan maibé gravida tan ona, entaun kontribui mós ba problema má nutrisaun tanba tenki hapara ona susu been esklusivu inan nian.
Notísia Relevante :Labarik 133 Enfreta Problema Má Nutrisaun, Na’in Neen Mate
Tuir loloos labarik ida tenki hetan susu been inan nian durante tinan rua nune’e bele prevene má nutrisaun ba labarik sira.
“Dalaruma inan balun labarik seidauk to’o tinan inan grávida ona entaun automatikamente inan tenki hapara susu been inan nian tanba ne’e itá garante labarik labele hetan má nutrisaun,”nia hateten.
Servisu Saúde Munisípiu Dili maka fó apoiu ai-moruk hanesan planpinat F70, F100 hodi distribui ba pasiente má nutrisaun nune’e bele rekupera sira nia pezu isin nian.
Entretantu, tuir dadus demográfiku no save peskiza saúde 2016, kuaze labarik na’in ida husi na’in haat 24% sei sofre má nutrisaun.
Jornalista : Felicidade Ximenes
Editór : Agapito dos Santos
