DILI, 23 jullu 2020 (TATOLI)- Komandu Jerál Polísia Nasionál Timor-Leste (PNTL) dezafia Agêncía Noticiosa Timor-Leste, TATOL,I.P atu kontinua servisu ho profisionál hodi fornese informasaun ne’ebé kredivel no balansu ba povu Timor-Leste iha rai-li’ur no rai-laran.
Notísia Relevante : PDHJ Husu Agêncía TATOLI Hasa’e Kobertura iha Area Boa-Governasaun
Komandu PNTL rasik apresia ho esforsu Governu Timor-Leste ne’ebé hahú harii Tatoli nu’udar ajénsia ofisiál Governu Timor-Leste hodi divulga informasaun sira ne’ebé liga ho servisu Estadu no sosiedade nia moris.
Tatoli nu’udar transformasaun hosi ETNA (East Timor News Agency). Agêncía ne’e aprova iha Konsellu Ministru no publika iha Jornál Repúblika iha loron 16 fulan Marsu 2016 nu’udar embriaun ho naran ANTIL.
Ezisténsia Tatoli ne’e lansa hosi eis Primeiru-Ministru, Rui Maria de Araújo iha loron 27 jullu 2016.
Relasiona ho aniversáriu ba dahaat (4) ne’ebé sei selebra iha loron 27 jullu ne’e, Xefe Gabinete Relasaun Públika no portavós PNTL, Superintendente Xefe Arnaldo dehan, Tatoli sai ona referénsia públiku hodi akompaña informasaun lalais liu ho fontes kredivel.
“Lori Komandu PNTL hato’o parabéns ba Agêncía Tatoli ne’ebé selebra aniversáriu ba dahaat, hein katak Tatoli bele sai média ida profisionál no bele fó mensajen ka notísia ne’ebé faktuál no kredivel ba komunidade tomak, liu-liu informasaun ne’ebé liga ho knaar servisu PNTL nian atu garante paz no estabilidade,” dehan Xefe Gabinete Relasaun Públika Superintendente Xefe Arnaldo, ohin, ba Agêncía Tatoli iha nia knaar fatin.
Komandu PNTL rasik apresia durante ne’e kria relasaun di’ak tebes ho ekipa Tatoli hodi fó sai informasaun loro-loron kona-ba knaar ka servisu PNTL nian hosi nasionál too munisipiu sira.
“Ami apresia informasaun sira ne’ebé Tatoli fó sai loroloron mesak informasaun di’ak ho fontes kredivel ema hotu bele asesu, tanba Tatoli média online ida ne’ebé fó sai informasaun lalais liu,” nia hateten.
Arnaldo Araújo mós dezafia Tatoli atu kontinua investe maka’as iha rekursu umanu hodi dezenvolve profisionalizmu jornalista ho kualifikadu.
Tuir Arnaldo, dezenvolve umanu importante, tanba Tatoli nu’udar fontes informasaun ofisial ba Estadu atu elabora notísia hosi nasionál, ba munisipiu too internasionál.
“Ba oin, Tatoli tenke profisionál no rona buat ne’ebé loos hodi hato’o informasaun ne’ebé loos, atu nune’e Tatoli ne’e moris ho informasaun di’ak ba oin tinan ba tinan,” nia hatete.
Superintendente Xefe, Arnaldo hatutan, atu lori públiku fó konfiansa di’ak liután ba ezisténsia Tatoli ohin ba futuru, Tatoli presiza kaer metin ninia prinsípiu no devér sira hodi fó sai informasaun ho akásia, rigor, independente, ezatidaun, klareza, integridade no kredibilidade.
Jornalista : Eugénio Pereira
Editór : Francisco Simões
