DILI, 23 jullu 2020 (TATOLI)-Treinadór Prinsipál Lalenok United FC, Simón Elissetche hateten sira nia klube halo ona preparasaun másimu hodi partisipa iha Kopa Federasaun Futeból Timor-Leste (FFTL) iha fulan-agostu ne’e.
“Ami foin hahú halo treinamentu ka preparasaun iha semana hirak liubá ho jogadór lokál hamutuk na’in 11 no na’in haat husi estranjeiru no jogadór na’in ualu seidauk mai hamutuk tanba sei hala’o treinamentu hela ho selesaun nasionál U-19,”dehan Simón ba Tatoli, liuhosi mídia sosiál facebook, kinta ne’e.
Lalenok United FC antes ne’e halo ona jogu amizade ho klube Sporting Clubo de Timor ho rezultadu 3-1, ho Fitun Estudante Lorosa’e 2-1, no As Marca (10-3).
“Husi rezultadu ne’ebé hatudu hosi jogu amizade sira bele hatene ona klube Lalenok iha ona forsa no vontade atu joga iha kopa FFTL 2020,”tenik tan.
Jornalista : Hortencio Sanchez
Editór : Agapito dos Santos
