DILI, 23 jullu 2020 (TATOLI) – Ministru Asuntu Parlamentár no Komunikasaun Sosiál, Francisco Jerónimo, informa lista jornalista ne’ebé konsidera hanesan liña frente iha ámbitu surtu COVID-19 submete ona ba Ministériu Finansa (MF) ho baze ba Dekretu-Lei 17/2020, kona-ba valór suplementu remuneratóriu hosi Fundu COVID-19.
Prezidente Repúblika dekreta ona dekretu-lei ne’e ba entidade hanesan Profesionál Saúde, FALINTIL-Forsa Defeza Timor-Leste (F-FDTL) no Polísia Nasionál Timor-Leste (PNTL) inklui seluk tán (outros).
“Ita-nia interpretasaun iha dektetu-lei ne’e, tanba sita de’it entidade hotu, maibé ita ba to’o kauza ida dehan sira seluk, ne’e dehan katak sira ne’ebé la sita no la temi naran iha dekretu-lei ne’e mós iha direitu atu hetan subsídiu maka hanesan jornalista sira,” tenik Ministru Francisco ba Agência Tatoli iha ninia knaar fatin, Palásiu Governu, kinta ne’e.
Tuir governante kona-ba interpretasaun ba lejizlasaun ne’e, jornalista sira iha liña frente tama kategoria iha dekretu-lei ne’ebé sita outros.
“Asuntu ne’e ha’u rasik halo ona prosesu hotu ona no haruka ona ba Ministériu Finansa, karik dehan seidauk ne’e tenke hateten mai ha’u dehan katak presiza tan saida atubele realiza pagamentu ba jornalista liña frente sira,” nia dehan.
Ho nune’e, nia promote kontinua buka solusaun rezolve situasaun ne’e atu MF bele halo pagamentu subsídiu ba jornalista sira.
“Ha’u mantein posizaun atu defende nafatin interese jornalista sira nia, liuliu liña frente atu hetan subsídiu hosi Fundu COVID-19,” nia otimizta
Lista jornalista sira ne’ebé sei hetan suplementu remuneratóriu tuir dadus ne’ebé mak kada mídia sira aprezenta no ekipa halo indetifikasaun hodi prenxe proposta ne’e no hatama ona ba MF.
“Ami haruka hotu ona ba Ministériu Finansa, maibé seidauk halo pagamentu entaun sala iha ne’ebé mak ha’u hakarak hatene, tenke hato’o filafali pareser atu ami hatene,” nia akresenta.
Kona-ba kritéria, tuir Ministru iha buat balun ne’ebé depende ba desizaun komisaun ne’ebé deside.
“Ha’u la haree klaru liu tanba ha’u la tama to’o iha ne’ebá, maibé ha’u prosesa de’it tuir buat ne’ebé husu mai atu halo no kuantidade subsídiu hira ne’e depende ba sira ona,” nia afirma.
Ba kestaun ne’e, Ministériu Asuntu Parlamentár no Komunikasaun Sosiál (MAPKOMS) mós levanta iha Konsellu Ministru atu hahú halo ona pagamentu ba jornalista sira.
“Ita bo’ot sira mós halo serbisu liña frente tanba ba aeroportu, fronteira no sentru saúde, Sala Situasaun Integradu Jestaun Krize (CIGC, sigla portugés) no ita bo’ot (jornalista) sira iha hodi halo serbisu ne’ebé importante tebes hodi divulga informasaun ba ema hotu atu akompaña surtu COVID-19 iha Timor-Leste,” Ministru subliña.
Jornalista: Florêncio Miranda Ximenes
Editora: Julia Chatarina
