DILI, 23 jullu 2020 (TATOLI)-Vise Ministru Saúde, Bonifácio Maucoli dos Reis, hateten Agência Tatoli presiza hadi’a di’ak liután kualidade informasaun hodi serbí povu no Estadu.
Governante hato’o ninia mensajen ne’e relasiona ho Tatoli ninia aniversariu ba dahaat ne’ebé maka sei selebra iha loron 27 fulan-jullu 2020.
Bonifácio reprezenta Ministériu Saúde kongratula estrutura Agência Tatoli hahú husi Prezidente to’o jornalista sira.
Nia observa katak durante tinan rua-resin Tatoli sempre fó espasu hodi halo kobertura ba ninia atividade.
”Ha’u- nia mensajen ba Agência Tatoli mak fó sai notísia ne’ebé mak reál no liliu nota liafuan sira ne’ebé mak durante ne’e uza liafuan tekniku balun no dalaruma ladun di’ak,”dehan Governante ne’e ba Tatoli, iha ninia servisu fatin Caicoli.
“Ba oin husu para bele hakerek buat saida mak ami ko’alia sai no aproveita oportunidade ne’e e hakarak hato’o parabens ba Tatoli no kontinua mantein nafatin servisu hamutuk ho Ministériu Saúde,’’katak nia.
Jornalista : Felicidade Ximenes
Editór : Agapito dos Santos
