DILI, 23 jullu 2020 (TATOLI)—Prezidente Parlamentu Nasionál, Deputadu Aniceto Longuinhos Guterres Lopes, husu Agência TATOLI públika informasaun ho responsabilidade tanba TATOLI nu’udar mídia Estadu Timor-Leste nian tenke rigór iha kualker infromasaun.
Aniceto Guterres hato’o kestaun ne’e iha ámbitu komemorasaun aniversáriu Agência TATOLI.IP (Instituisaun Públika) ba dahaat (IV) nian ne’ebe tuir planu sei realiza iha loron 27 fulan jullu tinan ne’e.
Notísia Relevante: Agêncía TATOLI Hahú Hatudu Avansu
“Ho realidade sosiál, polítika agora ne’e ita hakarak mídia ne’ebé iha liberdade maibé tenke iha responsabilidade. Katak, liberdade tenke tuir ho responsabilidade no rigór iha kualker infromasaun,” Prezidente Parlamentu Nasionál, Aniceto Guterres, informa ba Agência TATOLI liuhosi entrevista, kinta ne’e.
Prezidente Parlamentu Nasionál ne’e hateten, mídia iha liberdade atu krítika realidade sosiál no polítika oras ne’e maibé Agência TATOLI tenke iha responsabilidade hanesan mídia estadu nian.
“Hanesan órgaun komunikasaun sosiál mídia Timor nian no mídia Estadu nian, ha’u halo de’it votus parabéns no susesu hanesan ema hotu dezeja katak iha ita-nia rai tanba demokrasia, ita iha liberdade espresaun no liberdade imprensa mós,” Prezidente Parlamentu Nasionál, Aniceto Longuinhos Guterres Lopes, hateten.
Notísia Relevante: Notísia TATOLI Sai Referénsia Ba Meiu Komunikasaun Sira Hotu
Jornalista : Evaristo Soares Martins
Editór : Cancio Ximenes
