DILI, 26 jullu 2020 (TATOLI) – Embaixadór Uniaun Europeia (UE) ba Timor-Leste, Andrew Jacobs, informa daudaun ne’e UE hahú prepara programa ba kooperasaun foun ho Governu ba períodu 2021 to’o 2027 ne’ebé maioria sei foku ba apoia setór potensiál sira hodi dezenvolve ekonomia iha Timor-Leste.
“Ha’u hakarak prepara programa hodi suporta Timor-Leste ba dezenvolvimentu ekonomia iha forma akordu, nune’e mós ambiente ne’ebé di’ak ba dezenvolvimentu ekonomia. Ha’u sente ida ne’e importante ba Governu Timor-Leste,” tenik Embaixadór UE, foin lalais ne’e ba Agência Tatoli, iha ninia knaar fatin, Palm Bussiness Center, Surikmas Fatumenta.
Notísia Relevante: UE Transfere Ona Millaun $7,6 ba Konta Tezouru Governu Hodi Finansia Atividade Tolu
Tuir Andrew Jacobs, programa kooperasaun foun ba tinan oin aprezenta ona ba Governu Timor-Leste, ne’ebé sei aliña ba programa Governu atu dezenvolve rekuperasaun ekonómika hafoin situasaun COVID-19.
Diplomata ne’e dehan, parte UE kontinua serbisu hamutuk ho Governu iha integrasaun ekonomia hodi prepara Timor-Leste sai membru Asosiasaun Nasaun Sudeste Aziátiku (ASEAN, sigla inglés).
“Ha’u seidauk hatene osan hira maka ami atu suporta ba iha kooperasaun bilaterál ba tinan hitu mai ne’e, maibé ba tinan kotuk liubá ami supporta ona maizumenus millaun $110, tanba ne’e dalaruma ami sei supporta barak liu fali ida ne’e,” nia akresenta.
EU mós sei kontinua apoia área sira hanesan agro-floresta no jestaun finansa públika, maibé hakarak foku liuba dezenvolvimentu ekonómiku.
“Ami hakarak ajuda dezenvolve setór privadu sira hodi kria ambiente investimentu tanba daudaun ne’e laiha kompañia maka atu halo investimentu iha Timór. Tanba investe iha Timor-Leste komplikadu no difísil tebes atu impresta osan hosi banku, buat sira ne’e hotu maka ami hakarak serbisu ho Governu,” nia promote.
Embaixadór ne’e mós ko’alia kona-ba akordu ekonomia, tanba Timor-Leste presiza iha ambiente ne’ebé koñese ekomomia hodi bele harii indústria ne’ebé buras no bele prodúz osan.
Nune’e, UE hahú konsentra hela kona-ba programa nutrisaun, jestaun finansa públika no desentralizasaun inklui agro-floresta.
“Kona-ba agro-floresta ami iha programa boot ida hanaran ‘Ai Ba Futuru’, ne’ebé maka ajuda agrikultór sira hakiak no hamoris ai-horis oinoin,” nia subliña.
Iha loron 17 jullu, UE tranfere ona orsamentu millaun $7,6 ba konta Governu Timor-Leste hodi integra ba Orsamentu Jerál Estadu (OJE) hodi finansia atividade prinsipál tolu hanesan Jestaun Finansa Públika, Nutirsaun no Desentralizasaun.
Jornalista: Florêncio Miranda Ximenes
Editora: Julia Chatarina
