DILI, 28 jullu 2020 (TATOLI) – Komandante Jerál Polísia Nasionál Timor-Leste (PNTL), Komisáriu Faustino da Costa, informa katak maske iha konflitu ki’ik sira entre grupu juventude iha aldeia ho munisípiu balun, mas enjerál situasaun seguransa iha territóriu nasionál la’o hakmatek, paz no trankulidade.
Notísia Relevante : OJE 2020, PNTL Sei Selu Dívida Millaun $2.7
“Situasaun territóriu nasionál la’o di’ak, kalma no hakmatek, maibé iha kazu ki’ikoan iha akontesimentu ikus-ikus ne’e iha buat rua mak afeta rezulta ema mate hanesan asidente no insidente tara-an ne’ebé halo ema mate,” informa Komisáriu Faustino da Costa, ba jornalista, hafoin hala’o enkontru ho Komandante PNTL munisípiu hotu, ohin, iha Sentru Akademia Polísia Comoro, Dili.
Liuhosi sorumutuk ne’e, Komandante Jerál PNTL, Komisáriu Faustino da Costa ne’ebé akompaña mós Segundu Komandante Jerál PNTL Komisáriu Mateus Fernandes, hanesan avaliasaun ida ba servisu sira ne’ebé durante hala’o hosi komandante sira no saida mak komandu fó hanoin presiza hadi’a ba oin hodi asegura nafatin seguransa ba povu.
Komandu PNTL mós kontinua orienta Unidade Patrullamentu Fronteira (UPF) hodi hala’o kontrolu maka’as ba sirkulasaun sidadaun sira nian tama sai fronteira ho dalan legal hodi halo kontrola no prevensaun ba tranzmisaun surtu COVID-19.
Jornalista : Nelson de Sousa
Editór : Francisco Simões
