DILI, 29 jullu 2020 (TATOLI) – Governu liuhosi reuniaun Konsellu Ministru (KM) estraordinária iha loron 05 maiu aprova rezolusaun ne’ebé aprezenta husi Ministra Finansa interina, Sara Lobo Brites kona-ba suplementu remuneratóriu ba profesionál sira ne’ebé durante ne’e dedika sira nia-an no konsidera iha liña frente hodi halo prevensaun ligadu ho surtu COVID-19 iha Timor-Leste.
Maski durante ne’e serbisu jornalista iha ámbitu luta kontra COVID-19 konsideradu hanesan profisionál iha liña frente no Sekretaria Estadu Komunikasaun Sosiál (SEKOMS) inklui ona iha proposta atu asesu iha Fundu COVID-19, maibé to’o oras ne’e seidauk bele realiza pagamentu tanba iha dekretu-lei ne’ebé aprovadu la mensiona jornalista.
Ministru Finansa, Fernando Hanjam hateten Ministériu Finansa (MF) hamutuk ho Ministériu Asuntu Parlamentár no Komunikasaun Sosiál (MAPKOMS) sei presiza halo tan enkuadmentu legál atu nune’e bele halo pagamentu suplementu remuneratóriu ba jornalista liña frente.
“Klaru hosi MAPKOMS haruka lista jornalista, maibé enkuadramentu legál sira ita seidauk iha. Ohin ami haree hela, no fim ita bele haree enkuadramentu legál atu halo rezolusaun atu kobre jornalista sira ninian direitu,” tenik Ministru Fernando ba Agência Tatoli, iha Palásiu Governu, kuarta ne’e.
Iha Rezolusaun Governu, montante ne’ebé prevee ba Ministériu Saúde (MS) fahe ba kategoria tolu no ninia pagamentu konta kada loron, ne’ebé $25 ba kategoria dahuluk ba sira ne’ebé servisu iha izolamentu no laboratóriu, $20 ba sira ne’ebé servisu iha kuarentena no mós $15 ba sira ne’ebé serbisu administrativu ka sira ne’ebé apoiu maibé laiha kontaktu direta ho kazu ativu COVID-19.
Nune’e mós ba motorista, forsa, defeza, imigrasaun, kuarentena, alfándega, no sira ne’ebé servisu iha fronteira terrestre, aeroportu, no portu kada loron $15, ba pesoál agua no saneamentu, eletrisidade, limpeza, seguransa sivíl, no pesoál sira rekolla lixu kada loron $5.
Tanba iha rezolusaun ne’e rasik la inklui jornalista maka tuir Ministru katak MF presiza hatuur enkuadramentu legál nune’e bele hatudu pagamentu bazeia ba enkuadramentu ne’e rasik.
“Bainhira laiha, ami bele halo pagamentu maibé sei hetan dezafíu tanba presiza baze legál. Ohin ha’u konfirma ona ho MAPKOMS atu halo rezolusaun ida atu ita bele rezolve problema ne’e,” nia akresenta.
Tuir governante ne’e, pagamentu ba profisionál saúde sira, Polísia Nasionál Timor-Leste (PNTL) no FALINTIL-Forsa Defeza Timor-Leste (F-FFTL) hahú ona tanba kategoria ne’e inklui iha rezolusaun.
“Ba jornalista lista mai ona maibé ita seidauk bele halo pagamentu tanba laiha baze legál ne’ebé mensiona,” nia fó hanoin.
Maske nune’e, parte MF no MAPKOMS sei halo esforsu hodi bele halo pagamentu ba jornalista liña frente.
“Ami sei rezolve lalais no agora ha’u-nia ekipa jurídiku tenke ko’alia ho ekipa jurídiku MAPKOMS hodi haree be asuntu ne’e,” nia realsa.
Hatan ba kestaun ne’e, Ministru Asuntu Parlamentár no Komunikasaun Soasiál, Francisco Jerónimo, hateten nia parte esforsu hodi defende jornalista sira hodi hetan suplementu remuneratóriu.
“MAPKOMS ninia posizaun nafatin katak defende jornalista sira ne’ebé servisu iha liña frente. Ha’u halo submisaun nafatin no halo ona validasaun hotu ona,” nia informa.
Nia dehan, daudaun prosesu iha hela MF tanba lista jornalista submete ona.
“Agora ikus liu ne’e iha Ministériu Finansa atu haree oinsá bele rezolve. Ita bo’ot sira fiar nafatin ha’u katak ha’u sei defende nafatin, lalika tauk ida,” nia subliña.
Suplementu remuneratóriu ninia montante, Governu fixa tuir kategoria ne’ebé mak aprezenta hosi ministériu kompetente bainhira hato’o proposta.
Jornalista: Natalino Costa
Editora: Julia Chatarina
