DILI, 29 jullu 2020 (TATOLI)-Pasiente fase ran hamutuk na’in sanulu maka mate durante fulan hitu, komesa janeiru to’o jullu, divulga husi Departementu Hemodialisa Ospitál Nasionál Guido Valadares (HNGV-sigla portugés).
Hahú ínisiu fulan-janeiru to’o meadu fulan-jullu, HNGV atende ona pasiente fase ran hamutuk 26, no na’in 10 mak mate ona tanba ho kondisaun saúde grave no sofre moras komplikasaun hanesan , riins, kankru no seluk tan.
”Pasiente sira ne’ebé mak mai fase ran ne’e ho idade avansadu entaun sira ne’ebé mak mai fase ran ne’e ho moras komplikadu hanesan tensaun aas, ran midar,” informa Xefe Departamentu Hemodialisa HNGV, Rosentina da silva Nasimento, ba jornalista sira iha ninia servisu fatin, ohin.
HNGV iha kuartu espesifiku ba pasiente fase ran hamutuk tolu no kada kuartu iha kama haat kompleta ho mákina fase ran haat. Ospitál Nasionál iha mákina hamutuk 11, durante ne’e uza sanulu no ida rezervadu, maibé kuantidade ne’e konsidera la sufisiente hodi fó tratamentu ba pasiente fase ran ho númeru boot.
“Pasiente ne’ebé mak fase ran ne’e mós mai la’ós ida ka rua maibé barak hanesan pasiente hamutuk 90-resin, lorloron ami atende husi segunda to’o sábadu kada loron ida atende ba pasiente mínimu 35, no másimu 43 ida ne’e fiksu ba ami atu halo atendimentu ba pasiente regulár la inklui ho pasiente ne’ebé mak emerjénsia ka foun,” nia esplika.
Rekursu umanu no mákina fase ran sai fatór importante ida ne’ebé difikulta servisu departementu Hemodialisa ninian.
Profisionál Saúde hamutuk na’in 21 maka servisu iha departementu Hemodialisa, kompostu husi Timoroan 17 no enfermeiru Kubanu na’in haat, médiku jerál iha na’in rua.
Jornalista : Felicidade Ximenes
Editór : Agapito dos Santos
