DILI, 29 jullu 2020 (TATOLI)-Organizasaun Internasionál UNICEF iha Timor-Leste, kuarta ne’e entrega apoiu ekipamentu prevensaun COVID-19 ba prijaun Becora, Gleno Munisípiu Ermera no Suai Munisípiu Covalima.
Fasilidades hirak ne’e entrega husi Reprezentante UNICEF, Domingos da Costa Sousa ba Vise Ministru Justisa, José Edmundo Caetano, iha Prijaun Becora.
Notísia Relevante :EUA ho UNICEF Entrega Ekipamentu Prevene COVID-19 ba SSC
Ekipamentu Prevensaun COVID-19 ne’ebé maka UNICEF entrega ba Prijaun tolu ne’e maka hanesan luvas, máskara, hand sanitizer, tanki bee moos hamutuk rua no seluk tan.
José Edmundo Caetano, hateten ekipamentu hirak ne’e sei tulun guarda prijaun no dadur sira hodi prevene transmisaun COVID-19 iha Timor-Leste.
Notísia Relevante :MEJD Sei Simu Tan Apoiu Tanki Bee Moos Rihun 2 Husi UNICEF
“Ami agradese wain ba ita-nia parseiru hosi UNICEF ne’ebé mak suporta ona ami ba ekipamentu saúde nian hodi prevene Covid-19, ita fiar katak guarda sira no dadur sira sei utiliza ho di’ak tuir orientasaun ne’ebé Organizasaun Mundiál Saúde nian fó sai ona,”dehan Governante hafoin simu apoiu ne’e.
Nia husu ba Guarda prijaun no Dadur sira atu kontinua mantein distansia fiziku no sosiál, uza máskara, fase liman ho sabaun beibeik hodi prevene aan husi moras pandemia globál coronavirus.
Entrantu, Diretór Estabelesimentu Prizaun Becora, João Domingos, ba Tatoli, via telefone hateten tempu badak sei hamutuk ho Ministériu Justisa atu kontinua distribui apoiu ekipamentu hirak ne’e ba prijaun Suai no Gleno.
“Hodi dadur sira-nia naran hakarak agradese ba apoiu ne’ebe oferese husi UNICEF hodi prevene transmisaun COVID-19 iha prijaun Becora,”dehan Nia.
Notísia Relevante :UNICEF-UE Apoiu Ekipamentu COVID-19 ba Governu
Jornalista : Hortencio Sanchez
Editór : Agapito dos Santos
