DILI, 30 jullu 2020 (TATOLI)–Komandante Jerál Polísia Nasionál Timor-Leste (PNTL), Komisáriu Faustino da Costa, hateten iha tempu badak Komandu Polísia Nasionál Timor-Leste sei aumenta postu iha fronteira hodi asegura ema sira ne’ebé mak sei tama ilegal no sai ilegal ba Indonézia.
“Iha tempu badak, ita sei aumenta postu balu iha fronteira maibé ita presiza haree lai hodi asegura ema sira ne’ebé mak sei tama ilegal no sai ilegal ba Indonézia. Ami nafatin fó orientasaun maibé la’ós ba Unidade Patrullamente Fronteira (UPF) de’it maibé ba komandu PNTL munisípiu rua (2) hanesan Covalima no Bobonaro, no mós Rejiaun Adminitrativa Espesiál Oé-Cusse Ambeno, hamutuk ho nia lideransa komunitária no ofisiál suku sira para halo mós ninia atividade preventiva ba suku sira ne’ebé mak iha fronteira,” dehan Komisáriu Faustino da Costa ba jornalista sira hafoin hasoru malu ho Prezidente Repúblika, Francisco Guterres “Lú Olo”, iha Palásiu Prezidente Nicolau Lobato, Bairru Pité, Dili, kinta ne’e.
Komisáriu Faustino da Costa hateten, iha nasaun viziñu Indonézia ne’ebá sei iha moras COVID-19 ne’ebé rezulta ema rihun 5-resin mate, maibé sei iha ema balu hakarak buka dalan tama ilegal para atu ba rai liur liuliu ba Timor Osidentál-Indonézia.
“Iha semana liubá, ami impede timoroan dala rua. Iha grupu rua (2), grupu ida iha ema na’in-25 no grupu seluk iha ema na’in-30 resin ne’ebé hakarak ba Indonézia liuhosi dalan illegal. Entaun, ita atu dehan, se ita hatene ita-nia viziñu moras sei iha maibé ita hakarak ba entaun signifika ita hakarak oho ita-nia aan no ita-nia família sira,” Faustino da Costa hateten.
Ba ema hirak ne’ebé tama ilegal, Faustino da Costa dehan, komandu PNTL sei fó orientasaun ba seguransa iha fronteira atu lalika tolera ba hirak ne’ebé tama no sai ilegal tenke atua kedas.
“Ita sei iha orientasaun, ba ema sira ne’ebé mak hakarak illegal liuhosi fronteira, bainhira hetan lalika tolera no tenke atúa tiha. Timor-Leste laiha ona Estadu Emerjénsia maibé moras COVID-19 ne’e sei eziste. Tanba ne’e mak ohin mai aprezenta asuntu sira ne’e ba Prezidente Repúblika,” nia dehan.
Tanba ne’e, nia husu ba komunidade sira katak importante ba komunidade sira mak tenke kumpre nafatin regra ne’ebé mak Ministériu Saúde (MS) ho Organizasau Mundiál Saúde (OMS) fó sai ona no polísia sira kontinua asegura tanba ida-ne’e mós parte implementasaun nian.
Jornalista :Osória Marques
Editór :Cancio Ximenes
