DILI, 30 jullu 2020 (TATOLI)-Ministra Saúde, Odete Maria Freitas Belo, kinta ne’e inagura edifísiu Sentru Saúde Formoza II ne’ebé sai fatin ambulatóriu ba tratamentu saúde pasiente sira-nian.
Edifísiu ne’e hetan reabilitasaun husi FALINTIL-Forsa Defeza Timor-Leste (F-FDTL) husi Komponente Enjinária no voluntáriu Cruz Vermella Timor-Leste (CVTL) durante implementasaun Estadu Emerjénsia liga ho surtu COVID-19 hahú marsu no ramata iha jullu ho orsamentu rihun $ 40.
”Agradese tebes ho F-FDTL no CVTL ne’ebé mak servisu hamutuk ho ami halo reabilitasaun ho rezultadu ne’ebé mak diak tebes tanba ami Ministériu Saúde presiza tebes Sentru Saúde Formoza II ida ne’e tanba Vera Cruz sai fatin izolamentu ba iha pasiente sira ne’ebé mak ho moras COVID-19 se karik pozitivu ne’e iha,”dehan Ministra Saúde, iha ninia diskursu durante serimonia inagurasaun edifísiu ne’e iha Sentru Formoza Dili, kinta ne’e.
Ministériu Saúde si uza fatin ne’e ba ambulatóriu no fatin internamentu bae ma moras sira.
Atu rekoinese kontribuisaun husi Membru F-FDTL no CVTL nian, ohin MS distribui mós sertifikadu rekoinesimentu ba sira.
Partisipa iha serimonia inagurasaun ne’e maka Vise Xefe Estadu Maior Jenerál FALINTIL-Forsa Defeza Timor-Leste (F-FDTL), Brigadeiru Jenerál, Falur Rate Laek, Prezidente Autoridade Munisípiu Dili, Gaspar Soares, Cruz Vermella Timor-Leste, Diretóra Saúde Munisípiu Dili, Agostinha Segurado, profisionál saúde no seluk tan.
Jornalista : Felicidade Ximenes
Editór : Agapito dos Santos
