DILI, 14 agostu 2020 (TATOLI)-Governu liuhosi Ministériu Obra Públika (MOP), Ministériu Planu no Ordenamentu (MPO), no Ministériu Transporte no Komunikasaun (MTK) tau prioridade ba infraestrutura bázika iha 2021.
Relasiona ho planu prioridade sira ne’e maka Primeiru-Ministru (PM), Taur Matan Ruak, bolu Ministru Obra Públika, Salvador Eugênio Soares dos Reis Pires, hodi relata progresu ba preparasaun planu prioritáriu hirak ne’e.
“Primeiru-Ministru bolu ha’u atu relata progresu kona-ba ami-nia planeamentu investimentu, liuliu iha 2021 iha kapitál dezenvolvimentu tolu iha infraestrutura bázika hanesan bee moos, eletrisidade no estrada,” informa Ministru Salvador hafoin ramata reuniaun Xefe Governu iha Palásiu Governu, sesta ne’e.
Antes ne’e, MOP, MPO no MTK halo ona koordenasaun hodi konsentra ba prioridade ba iha 2021 tanba ministériu tolu ne’e sei iha ligasaun serbisu.
Kona-ba konstrusaun sesaun estrada sei liga ba área produtiva ho merkadu no haree ba kuantidade demográfiku iha área refere.
Planu ba bee-moos iha ona dezeñu hamutuk 21 ne’ebé mak preparadu hela no prevee iha orsamentu 2020, maibé labele implementa tanba polítika maibé iha 2021 sei implementa planu ne’e.
Tuir dadus hosi MOP nian katak populasaun ne’ebé asesu ona bee-moos hamutuk porsentu 50.
Iha 2020 MOP planea implementa estrada rurál ho totál kilometru 270, maibé tanba OJE 2020 laiha entaun prevee hikas iha OJE 2021.
Enkuantu, kona-ba eletrisidade, iha suku 77 maka seidauk asesu enerjia eletrisidade no tau ona planu ba Orsamentu Jerál Estadu (OJE) 2020 no 2021 atu implementa pakote 33 ne’ebé mak ninia dezeñu no Bill of Quantity (BoQ) prontu ona no MOP haruka ona ba Ajénsia Dezenvolvimentu Nasionál (ADN) atu halo verifikasaun.
Pakote 33 eletrisidade ne’ebé sei implementa ne’e kuaze iha munisípiu hotu no ninia prioridade bazeia ba suku ne’ebé besik liu liña infraestrutura ka distribuisaun ne’ebé ezistente, atu nune’e bele diretamente halo konesaun ba enerjia eletrisidade.
Jornalista: Antónia Gusmão
Editora: Julia Chatarina
