Tribunál adia leitura desizaun ba kazu droga
DILI, 21 agostu 2020 (TATOLI)-Tribunál Distritál Dili (TDD), ohin, adia julgamentu ba leitura desizaun final ba kazu droga ne’ebé envolve husi arguidu JGB ne’ebé antes ne’e haruka kazál timoroan lori Pill Ecstasy sai husi territóriu Timor-Leste ba Indonézia liuhusi fronteira Motain iha tinan 2019.
Notísia Relevante : Kazu droga, MP alega pena prizaun tinan-15 ba arguidu JGB
Tuir loloos audiénsia ne’e, ohin, tuku 9:00 dadeer, atu rona leitura, maibé Tribunál koletivu husu ba parte Ministériu Públiku (MP) atu junta mós ho aktu teste laboratóriu ba matéria Ddoga husi parte Indonézia nian hafoin omóloga.
“Buat hotu loos ona, ohin, ita submete dokumentu teste ne’e ba Tribunál no Tribunál adia hodi hein notifikasaun tuir mai,” hateten Prokuradór titular, Luis Hernanio Rangel, iha TDD.
Iha loron 4 agostu 2020, Ministériu Públiku (MP) liuhusi Prokuradór titular Luis Hernanio Rangel, iha nia alegasaun husu ba Tribunál Distritál Dili (TDD) atu aplika pena prizaun efetivu tinan-15 ba arguidu JGB ne’ebé deskonfia komete krime prátika tráfiku droga no atividade ilísitu ne’ebé antes ne’e haruka kazál timoroan lori Pill Ecstasy sai husi territóriu Timor-Leste husi Motain ba Indonézia.
Liuhusi audiénsia julgamentu ne’ebé prezide husi juis koletivu Julmira Auxiladora, João Ribeiro, Argentino Nunes ne’e, MP husu atu aplika pena ne’e tanba iha produsaun prova no faktu, maske arguidu ho hili dalan nonook la ko’alia iha julgamentu sira liu ba. Nia ko’alia de’it iha julgamentu primeiru interrogatóriu no rona mós parte sasin sira katak, no entendimentu MP nian prienxe krime tanba simu duni sasán husi Afrikanu ida ho inisiál VCO depois haruka fila-fali ba Indonézia.
Prokudór titular Luis Hernanio Rangel hateten, kona-ba prova printer haruka husi liur mai la liu hosi Indonesia maibé to’o tiha Timor-Leste mak haruka sai fali, mezmu kompañia JVK rasik nia ‘cabang’ iha Indonézia, tanba sa la direita, nune’e mosu indísiu sasán ilísitu droga ne’ebé perigu hodi fó ameasa ba nasaun.
Tuir entendimentu MP nian prienxe elementu krime hodi kondena arguidu JGB hanesan autoria materiál ba pratika krime-rua (2); Tráfiku no atividade ilísitu, P no P tuir artigu 7 númeru 1 no krime Asosiasaun Kriminoza P no P tuir artigu 10 númeru 1, husi lei númeru 2/2017, kona-ba kombate Tráfiku Ilísitu, ho forma konsumada, ho nia agravasaun tuir artigu 9 alínea E,K husi lei ne’ebé mak hanesan. Husi krime rua ne’e ninia agravasaun pena tinan-10 to’o tinan-15. Nune’e MP husu tribunál koletivu atu aplika pena prizaun efetivu tinan 15 ba arguidu.
MP mós husu Tribunál atu aplika pena expulsaun iha artigu 87, katak sidadaun estranjeiru ne’ebé hetan kondenasaun tanba prátika krime ne’ebé fó fatin prizaun aas liu tinan-tolu (3) no seidauk hela iha Timor-Leste tinan-15 bele hetan expulsaun husi territóriu nasionál, inklui taka atividade ne’ebé nia hala’o.
Tuir faktu ne’e arrola hosi Ministériu Públiku katak, iha loron 29 maiu 2019, Polísia Investigasaun Nasionál Narkotika nian simu, informasaun ( via WhatsApp) husi POLRI iha Atambua Motain, iha loron ne’ebá maizamenus iha tuku 15h30 katak, POLRI detein ona kazál timoroan iha Motain ne’ebé mak pertensia ba territóriu Indonézia nian tanba lori droga ho tipu Ecstasy.
Bainhira Polísia Indonézia halo detensaun no pasa revista ba kazál timoroan ne’e, deteta katak, sira lori duni Pill Ecstasy husi territóriu Timor-Leste ho nia kuantidade 4.874 ho nia modelu ne’ebé maka hanesan, maibé kór maka lahanesan no balun kór matak, azul no kór kafé.
Notísia Relevante : TDD rona sasin ba kazu droga iha relasaun ho kondenadu kazál timoroan
Iha audiénsia julgamentu ne’e, arguidu hetan asisténsia legal husi advogadu privadu Domingos Pinto, José Andrade ho Agostinho de Jesus.
Notísia Relevante : Kazu Droga, Arguidu JGB Iha Relasaun Ho Kondenadu Kazál Timoroan
Jornalista : Nelson de Sousa
Editór : Francisco Simões
