DILI, 25 agostu 2020 (TATOLI)-Movimentu kontra lei kriminaliza difamasaun (LKD), ohin, hala’o sorumutuk ho Ministru Prezidénsia Konsellu Ministrus (PCM-sigla portugés), Fidelis Manuel Leite Magalhães, hodi troka ideia kona-ba preokupasaun movimentu nian kona-ba esforsu Governu atu halo alterasaun lei difamasaun husi kódigu sivíl ba kódigu penal (kriminaliza difamasaun).
Notísia Relevante : CI iha Papél Importante Kontra Esbosu-Lei Kriminaliza Difamasaun
Movimentu ne’e kontra LKD ne’e kompostu husi Provedoria Direitu Umanu no Justisa (PDHJ), OXFAM, Programa Monitorizasaun Sistema Judisiál (JSMP-sigla Ingles), Asia Justice and Rights (AJAR), Asosiasaun HAK, Rede ba Rai, Alfela, Asosiasaun Jornalista Timor Lorosa’e (AJTL), Conselho de Imprensa (CI), ONG FONGTIL, Organizasaun Universitária, Organizasaun rezisténsia no seluk tan.
Porta voz Movimentu kontra LKD, Inocêncio Xavier, agradese ba ministru PCM ne’ebé bele simu ona sira-nia parte hodi troka ideia sira no durante sorumutuk movimentu ne’e halo diskusaun no aprezenta matéria substánsia ho pozisaun klaru hamutuk ho povu baibain preokupa ho ezbosu lei ne’ebé prepara husi Ministériu Justisa.
“Ami iha obrigasaun atu hato’o ba iha Ministru kona-ba preokupasaun públiku no povu nian hodi konsidera karik aban bainrua ministru proponente hato’o iha Konsellu Ministru (KM) nune’e iha ona informasaun hodi haree tuir rejimentu konsellu ministru nian kumpre regra konstitusionalidade ka la’e. Se la halo tuir bele rejeita no la presiza lori mai diskute iha KM,” hateten Inocêncio Xavier ba jornalista hafoin remata enkontru iha Palaçio do Governo.
Notísia Relevante : Paresér JSMP Ba MJ, Kontra Ezbosu Lei Kriminaliza Difamasaun
Movimentu kontra LKD hato’o petisaun ne’ebé ‘abaixu asinadu’ husi sidadaun iha territóriu nasionál hamutuk na’in-819 ba Ministru PCM no tuir ajenda iha parte mós lokraik sei submete petisaun ba Prezidente Repúblika, Prezidente Parlamentu Nasionál no Ministériu Justisa.
Inocêncio Xavier afirma, razaun kontra total ezbosu lei ne’e ; primeiru tanba Estadu direitu demokrátiku no konstituisaun hatete hanesan iha artigu 40 no 41 direitu ba informasaun nu’udar direitu obrigasaun Estadu presiza promove la’ós mai hapara no Timor-Leste mós ratifika konvensaun internasionál sira lubuk kona-ba direitu umanu.
Nia dehan, LKD mós kontra prinsípiu luta rezisténsia, no relatóriu komisaun Akollamentu Verdade no Rekonsiliasaun (CAVR-sigla portugés) depois ukun an laiha kriminalizasaun difamasaun no iha istória jornalista barak mate tanba lia loos.
Notísia Relevante : AJTL Kontra Ezbosu Lei Kriminaliza Difamasaun
“Ami iha no ami mai atu asegura direitu sira-ne’e nian no direitu ba liberdade,” nia afirma.
Notísia Relevante : Horta Kontra Esbosu Lei Kriminaliza Difamasaun
Jornalista : Nelson de Sousa
Editór : Francisco Simões
