DILI, 28 agostu 2020 (TATOLI)-Primeiru-Ministru (PM), Taur Matan Ruak, konvoka reuniaun ho liña ministériu hodi asiste aprezentasaun kona-ba projetu fibra óptika, liuliu ba modalidade finansiamentu atubele tau iha planu orsamentu 2021.
Xefe Governu hamutuk ho Ministru Prezidénsia Konsellu Ministru Fidelis Manuel Leite Magalhães, Ministru Transporte no Komunikasaun José Agustinho da Silva, Ministru Asuntu Parlamentár no Komunikasaun Sosiál Francisco Jerónimo no Vise-Ministra Finansa Sara Lobo Brites, asiste aprezentasaun kona-ba projetu fibra óptika hosi Vise PM no Ministru Planu no Ordenamentu, José Maria dos Reis ho ekipa.
Hafoin aprezentasaun, Vise PM José Maria dos Reis, hateten diskusaun fibra óptika ne’e halo ona iha tinan lima ba kotuk no daudaun sei iha prosesu dezeñu, tanba ne’e ho ekipa mai aprezenta ba PM no ministériu relevante.
“Iha aprezentasaun ne’e, ekipa tékniku ko’alia kona-ba opsaun sira, nune’e Primeiru-Ministru husu halo kontinuidade diskusaun hodi haree dezvatajen no vantajen atubele foti modalidade orsamentu fibra óptika nian,” tenik Vise PM iha Pálasiu Governu, sesta ne’e.
Ministru Planeamentu Ordenamentu ne’e haktuir, iha enkontru ne’e Xefe Governu husu atubele halo diskusaun kle’an liu iha tempu badak atu lori ba konsellu Ministru atubele hetan aprovasaun ba opsaun sira ne’ebé aprezenta ona.
Tuir governante ne’e, modalidade sei maihusi opsaun rua hanesan orsamentu hosi Austrália hamtuk ho Governu Timor-Leste no opsaun seluk maka Austrália halo rasik proketu ne’e maka Governu simu de’it.
“Tanba ne’e mak sei halo diskusaun kle’an hodi haree opsaun molok aprezenta ba Konsellu Ministru atu aprova. Tanba diskusaun ne’e importante atubele aloka iha orsamentu 2021 ba opsaun sira iha projetu fibra óptika ne’e, maibá totál orsamentu iha diskusaun nia-laran,” nia subliña.
Jornalista: Florêncio Miranda Ximenes
Editora: Julia Chatarina
