DILI, 09 setembru 2020 (TATOLI)-Ministru Ensinu Superiór, Siénsia no Kultura, Longuinhos dos Santos, aprezenta projetu rezolusaun Governu kona-ba nomeasaun Rui Daniel de Carvalho ba Prezidente Konsellu Jerál Institutu Politékniku Betano (IPB) no Edmundo Viegas hanesan suplementu Konsellu Jerál IPB nian.
Diploma ne’e hetan ona aprovasaun iha reuniaun Konsellu Ministru ordinária kuarta ne’e.
“Rui Daniel de Carvalho troka Armindo Maia mak altura ne’ebá asume funsaun ida ne’e tanba agora Armindo Maia nu’udar Ministru Edukasaun, Juventude no Desportu ne’ebé presiza troka,” relata Ministru Prezidénsia Konsellu Ministru, Fidelis Manuel Leite Magalhães, hafoin ramata reuniaun ezekutivu iha Palásiu Governu.
Mandatu ba prezidente Konsellu Jerál IPB durante tinan tolu, hahú 2020 to’o 2023.
Jornalista: Antónia Gusmão
Editora: Julia Chatarina
