DILI, 14 setembru 2020 (TATOLI)-Uniaun Europeia (UE) apoiu fundu $707.000 ba asosiasaun TANE Konsumidór, hodi kapasita rekursu umanu no bele nafatin defende direitu konsumidór timor-oan sira.
Embaixadór UE iha Timor-Leste, Andrew Jacobs, hateten apoiu fundu asosiasaun ne’e ho objetivu defende direitu konsumidór ne’ebé prevee iha Lei númeru 8/2016, loron 8 jullu, nu’udar direitu fundamentál hadi’a partisipasaun autonomia no atititude krítika konsumidór.
“Ha’u haksolok tebes partisipa iha atividade TANE Konsumidór ka Asosiasaun Defensa konsumidór Timor-Leste. TANE liuhosi kolaborasaun ho asosiasaun Portugeza Defeza Konsumidór DECO, hetan finansiamentu hosi Uniaun Eropeia hamutuk €620.000 (ekivalente $707.000),” dehan Andrew Jacobs, iha Departamentu Komunikasaun Sosiál, Universidade Nasionál Timor-Leste (UNTL), Caicoli, segunda ne’e.
Embaixadór ne’e iha esperansa, liuhosi fundu ne’e bele defende direitu konsumidór, ne’ebé UE rasik implementa ona projetu ne’e durante tinan haat hodi promove Lei Defeza Konsumidór nian ho konsumidór timor-oan atu garante merkadu no organizasaun públiku atu sai konsumidór informadu liután no hakbiit.
“Ita hotu hatene katak konsumidór sira-nia direitu ba kualidade sasán no servisu sira ne’ebé konsumu hetan informasaun ne’ebé loloos no hetan protesaun ba ninia saúde, seguransa no sira-nia interese ekonómiku, tanba tuir Konstituisaun iha artigu 53 hateten katak ita tenke hatene ita-nia direitu atu uza no bainhira la hatene informasaun la bele uza,” nia subliña.
Tanba ne’e nia dehan, UE servisu hamutuk ho asosiasaun TANE konsumidór hodi reforsa hamutuk ho autoridade lokál no privadu ba impotánsia programa konsumidór ne’ebé iha objetivu boot ba dezenvolvimentu sustentável hametin asosiasaun ho objetivu ba informasaun, edukasaun, formasaun, reprezentasaun, no mobilizasaun konsumidór timor-oan.
Jornalista: Antónia Gusmão
Editora: Julia Chatarina
