DILI, 18 setembru 2020 (TATOLI)-Liuhosi reuniaun Konsellu Minstru (KM) estraórdinaria, Ministra Negósiu Estranjeiru no Kooperasaun (MNEK), Adaljiza Magno, aprezenta relatóriu daruak ba membru Governu sira kona-ba ‘States of Fragility’ (Estadu sira iha situasaun frájil) iha tinan 2020.
Ministru Prezidénsia Konsellu Ministru, Fidelis Manuel Leite Magalhães, informa relatóriu ne’e publika iha loron 17 setembru hosi organizasaun mundiál ba Kooperasaun no Dezenvolvimentu Ekonómiku (OCDE, sigla portugés).
“Relatóriu ne’e hatudu katak Timor-Leste ninia frajilidade diminui ona iha dimensaun hotu, exetu seguransa ne’ebé hatudu aumentu frajilidade oituan no destaka tuun, ne’ebé notável frajilidade ekonómika no ambientál hanesan fatór ne’ebé kontribui ba Timor-Leste nia saída hosi lista Estadu sira ne’ebé konsidera frájil ba dalahuluk,” relata Ministru Fidelis hafoin ramata reuniaun ezekutivu estraordinária iha Palásiu Governu, sesta ne’e.
Governante ne’e dezeja entidade hotu kontinua halo servisu maka’as atu tinan hirak tuirmai Timor-Leste sei la konsideradu hanesan Estadu frájil.
“Estadu frájil ne’e dehan Estadu ne’ebé lametin, maibé tanba relatóriu ne’e hatudu katak hasai tiha ona entaun iha rekoñesementu internasionál katak Timor-Leste konsidera hanesan Estadu ne’ebé metin no forte,” Ministru Fidelis esplika.
Timor-Leste nu’udar Estadu Demokrátiku iha ninia nível liberdade aas, dezenvolve hela instituisaun sira no esforsu atu dezenvolve liután setór ekonómiku, sosiál ba sidadaun sira ne’ebé mak bele kontribui hametin liután nasaun joven ne’e ninia demokrasia, paz no estabilidade.
Maske nune’e, membru ezekutivu ne’e nota katak Timór sei kontinua hasoru dezafíu tanba nu’udar país nurak hela, liuliu iha área sosio-ekonómiku nian.
“Entaun Estadu tenke halo esforsu hotu hodi kontinua halo mudansa iha dezenvolvimentu ekonómiku,” nia akresenta.
Jornalista: Antónia Gusmão
Editora: Julia Chatarina
