DILI, 14 outubru 2020 (TATOLI)-Médiku Espesialista Psiquiatria Ospitál Nasionál Guido Valadares (HNGV-sigla portugés) Dili, Gaspar Quintão, hateten durante impelementasaun Estadu Emerjénsia, Sala Koidadu Agudu ka Acute Care halo ona tratamentu ba pasiente hamutuk 37 ne’ebé iha problema ho psikolojia ka mentál ne’ebé tenta atu oho aan.
Husi númeru ne’e, na’in 22 feto no 15 mane, ba pasiente feto maioria ho idade ki’ik.
”Se nia hasoru problema agudu bele ajuda baixa no halo tratamentu iha Unidade Acute Care HNGV hodi hetan asisténsia husi médiku sira,” nia dehan ba Tatoli iha HNGV Dili, kuarta ne’e.
Hodi dehan tan atu evita aan husi problema psikolojia no sentimentu stress nian maka ema idaidak persiza halo ezersísiu barak, desportu, konsumu hahán ne’ebé nutritivu no deskansa ho di’ak.
”Haree ba ita-nia fiziku ne’ebé mak iha halo ezersísiu ne’ebé mak iha atu nune’e ita bele kontente nafatin iha paz atu labele monu ba moras sira ne’e depois espíritu ida mak ita hanesan ema sarani ita tenke ba misa, le’e Biblia no halo karidade, atu nune’e buat tolu ne’ebé mak ita iha mantein ita atu ita labele monu ba iha ne’ebá,” nia hateten.
Daudaun ne’e Sala Tratamentu Agudu ka Acute Care HNGV iha Médiku Kubanu ida no Timoroan Na’in ida, médiku ba psikolójiku na’in ida no médiku jerál na’in tolu.
”Médiku sira ne’e ba oin ita presiza tanba agora daudaun ita hanoin hela oinsá atu aumenta tan médiku ba acute care ninian maibé enfermeru sira ne’ebé mak jerál ita hanorin hela sira oinsá lorloron atu tau matan hela ba moras mentál sira,” Médiku Espesialista Psiquiatria hateten.
Jornalista : Felicidade Ximenes
Editór :Agapito dos Santos
