DILI, 15 outubru 2020 (TATOLI)—Governu liuhosi Ministériu Saúde ho ministériu relevante inklui parseiru dezenvolvimentu sira, iha kinta ne’e, selebra loron mundiál fase liman ho sabaun hodi prevene aan husi transmisaun COVID-19 no moras sira seluk tan.
Ministériu Saúde hamutuk ho Ministériu Edukasaun Juventude no Desportu, Ministériu Obra Públika, Cruz Vermella Timor-Leste, UNICEF, Organizasaun Mundiál Saúde, Water Aid, Catalpa, Uniaun Europeia maka hamutuk selebra loron mundiál fase liman ho sabaun ne’e iha Dili.
Notísia Relevante :CARE Internasionál selebra loron mundiál fase liman
”Hau hanoin fase liman ho sabaun ne’e hanesan meius ida ita bele prevene moras COVID-19 iha Timor-Leste ho razaun ida ne’e mak Ministériu Saúde hala’o atividade kampaña fase liman ho sabaun iha Dili laran, nune’e promove ba ita-nia komuniaddae sira atu iha koñesimentu no konsiénsia atu fó importansia ba fase liman ho sabaun hodi prevene COVID-19 no mós diarea moras kulit no ISPA,” Informa Diretora Nasionál Saúde Públika, Isabel Gomes, ba jornalista sira iha edifísiu Ministériu Saúde Caicoli.
Uma-kain idaidak tenki iha konsiénsia no abitua atu fase liman beibeik ho sabaun nune’e bele prevene família husi moras hada’et no la hada’et sira iha rai-laran.
Ministériu Saúde nota durante implementasaun Estadu Emerjénsia iha territóriu Timor-Leste, komunidade barak maka iha konsiénsia fase liman ho sabaun.
”Komunidade barak mak iha ona konsiénsia kona-ba fase liman ho sabaun ezemplu hanesan loza sira ne’ebé mak iha Dili laran bainhira ita tama ba loza bee no sabaun ema rai ona iha odamatan nian antes tama fase liman mak tama ba loza laran,” Ezekutiva ne’e dehan.
Hatan kona-ba problema falta bee moos, nia dehan, ne’e la’ós responsabilidade Ministériu Saúde nian de’it maibé, Ministériu Obra Públika liuhusi Diresaun Agua no Saneamentu atu garante bee moos ba komunidade sira.
Tanba ne’e, nia hateten atu rezolve problema falta bee moos maka Instituisaun Estadu relevantes presiza kria liña koordenasaun di’ak liután hodi forñese bee moos ba komsumidór sira ho sufisiente.
Entretantu, durante selebrasaun loron mundiál fase liman, Ministériu Saúde ho Instituisaun relevante hala’o kampaña nasionál ida hodi hale’u Dili laran, hahú husi edifísiu Ministériu Saúde ba Merkadu Taibesi, Eskola Sekundáriu Públiku 12 de Novembru, Terminal Becora, UNITAL, Merkadu Becora, Jardim Largo Lecidere, Merkadu Manleu, Merkadu Tasi-Tolu, Eskola 30 de Agosto no ramata iha UNTL Dili.
Notísia Relevante :HNGV Komemora Loron Mundiál Fase Liman
Jornalista : Felicidade Ximenes
Editór:Agapito dos Santos
