DILI, 28 outubru 2020 (TATOLI)—Governu liuhosi reuniaun Konsellu Ministru aprova projetu dekretu Governu kona-ba regulamentu apoiu finanseiru ne’ebé sei atribui ba kombatente veteranu libertasaun nasionál ida-idak.
Proposta ne’e aprezenta hosi Ministru Asuntu Kombatente no Libertasaun Nasionál, Júlio Sarmento da Costa ‘Meta Mali’.
“Apoia finanseira ne’ebé mak Governu sei atribui ho valór $40.000 ba kada ema, ba kombatente veteranu libertasaun nasionál sira ne’ebé mak luta ba libertasaun nasionál durante tinan 20 to’o 24,” Ministru Prezidénsia Konsellu Ministru, Fidelis Manuel Leite relata hafoin ramata reuniaun ezekutivu iha Palásiu Governu, kuarta ne’e.
Notísia relevante: MAKLN sei aloka osan $2,400,000 konstrui uma 60 ba veteranu
Apoiu ne’e hodi konstrui uma adekuadu no justu ba veteranu hamutuk 60 ne’ebé korresponde ho totál orsamentu millaun $2,4.
Veteranu sira ne’ebé luta durante tinan 24 nia laran iha ai-laran hamutuk na’in-98, ne’ebé barak liu hosi rejiaun I Lospalos, rejiaun II Viqueque, Baucau no seluk tan.
Jornalista: Antónia Gusmão
Editora: Julia Chatarina
