Komandu PNTL orienta konsulta médiku obrigatóriu ba membru hotu
DILI, 10 novembru 2020 (TATOLI)- Komandu Jerál Polísia Nasionál Timor-Leste (PNTL) hatún ona orientasaun ekipa médiku PNTL atu halo konsulta médiku obrigatóriu ba membru polísia hotu iha territóriu Timor-Leste.
Segundu Komandante Jerál PNTL, Komisáriu Mateus Fernandes esklarese, objetivu hodi fó konsulta médiku ne’e atu kontrola membru tomak nia kondisaun saúde. Tanba komandu jerál PNTL preokupa, durante ne’e ofisiál superiór PNTL no ajente barak sofre moras hodi halo balun mate derrepente.
“Ita nia membru polísia sira ikus-ikus ne’e kuandu servisu barak moras derrepente, tanba ne’e, ami antesipa hodi halo konsulta obrigatóriu ba membru sira para ita bele kontrola ita nia aan no hatene karik moras saida mak iha ita nia laran,” Komandante Mateus Fernandes informa ba jornalista, ohin, iha Komandu Unidade Espesiál Polisia (UEP), Bairru-Pité, Dili.
Nia hatutan, mezmu ekipa médiku PNTL sei iha fasilidade médiku ne’ebé limitadu, maibé sira sei halo esforsu atu servisu hamutuk ho Ministériu Saúde hodi fó asisténsia saúde di’ak liután ba membru PNTL sira.
Komandu PNTL mós fó instrusaun ba komandu unidade hotu-hotu atu hala’o atividade ezersísiu kada semana hodi kontrola membru sira nia kondisaun fíziku no saúde bele di’ak nafatin.
Durante janeiru to’o novembru 2020, membru PNTL hamutuk ema na’in-haat maka mate tanba sofre moras oin-oin.
Jornalista : Eugénio Pereira
Editór : Francisco Simões
