DILI, 16 novembru 2020 (TATOLI)—Progresu ezekusaun Orsamentu Jerál Estadu (OJE) 2020 nian hosi Ministériu Asuntu Parlamentár no Komunikasaun (MAPKOMS) atinje ona 76%.
Ministru Asuntu Parlamentár no Komunikasaun Sosiál, Francisco Jerónimo, ne’ebé akompaña hosi Sekretáriu Estadu Komunikasaun Sosiál, Merício Akara, relata progresu ezekusaun ne’e bainhira hala’o audiénsia ho Komisaun G Parlamentu Nasionál (trata asuntu Edukasaun, Juventude, Kultura no Sidadania) kona-ba ezekusaun OJE 2020 no mós projesaun OJE 2021 nian.
“Ezekusaun orsamentu 2020 nian to’o iha fulan-outubru atinje 76%,” Francisco Jerónimo informa ba jornalista sira, iha resintu Parlamentu Nasionál, segunda ne’e.
Notísia relevante: MAPKOMS prevee millaun $9 iha OJE 2021
Orsamentu MAPKOMS inklui SEKOMS iha tinan 2020 ho montante millaun $4,368. Montante osamentu ne’e ezekuta programa sira hanesan asegura koordenasaun regulár ho Parlamentu Nasionál, propoin polítika no elabora lejizlasaun no regulamentasaun nesesária iha área komunikasaun sosiál, ezerse superintendénsia no tutela órgaun komunikasaun sosiál Estadu nian no halo diseminasaun informasaun kona-ba programa no asaun Governu nian.
Iha parte seluk, Ministériu ba Asuntu Parlmentár no Komunikasaun Sosiál propoin millaun $ 9.930 ba tinan fiskál 2021.
Governante ne’e esplika montante orsamentu hirak-ne’e inklui hotu MAKPKOMS rasik, SEKOMS, RTTL, Agência TATOLI, Rádiu Komunidade 16 iha territóriu nasionál no diresaun tomak ne’ebé tutela ba ministériu refere.
Medida prinsipál setoriál hosi MAPKOMS ba tinan fiskál 2021 mak kontinua asegura koordenasaun regulár ho Parlamentu Nasionál, propooin polítika no elabora lejizlasaun no halo regulamentasaun nesesária iha área komunikasaun sosiál.
Nune’e mós, MAPKOMS ezerse superintendénsia no tutela órgaun komunikasaun sosiál Estadu nian no koordena diseminasaun informasaun kona-ba programa no asaun Governu nian.
Ministériu ba Asuntu Parlamentár no Komunikasaun Sosiál nu’udar departamentu governamentál responsável ba konsesaun, ezekusaun, koordenasaun no avaliasaun polítika, definida no aprovada liuhosi Konsellu Ministru reprezenta área komunikasaun sosiál no asuntu parlamentár.
Jornalista: Evaristo Soares Martins
Editór: Xisto Freitas
