DILI, 17 novembru 2020 (TATOLI)—Primeiru-Ministru (PM), Taur Matan Ruak, otimista liña ministeriál no instituisaun Estadu sira sei ezekuta Orsamentu Jerál Estadu 2020 ho di’ak tuir prioridade no programa VIII Governu Konstitusionál.
“Ohin loron 17 novembru, ha’u hanoin ministériu hotu halo hela esforsu atu halo ezekusaun no ha’u fiar katak to’o tinan remata ezekusaun sei la’o di’ak,” Xefe Governu hateten hafoin enkontru semanál ho Prezidente Repúblika, iha Palásiu Prezidensiál, Bairro Pité, tersa ne’e.
Tuir dadus hosi portál Transparénsia Orsamentál, hatudu orsamentu orijin ba tinan fiskál 2020 maka $1.497.042.620, ne’ebé ho kompromísiu $94.264.942,69, obrigasaun $49.637.284,41, atuál $802.121.935,60 no balansu $550.997.393,05 ne’ebé korresponde ho 56,9%.
Enkuantu, reseita hosi orsamentu orijin maka $172.347.890, atuál $686.260,907.73 ho balansu $513.913.017,73, ne’ebé korresponde 398,2%.
“Ezekusaun jerál agora la’o hela no Governu nafatin halo esforsu, prátikamente barak liu mak ita ezekuta ona, agora presiza ezekuta mak novembru no dezembru,”
Orsamentu Jerál Estadu tinan 2020 ho montante totál biliaun $1,497, atu kobre nesesidade ba programa no prioridade nasionál ne’ebé VIII Governu Konstitusionál define ona, liuliu iha nível estabilizasaun setór sosiál no ekonómiku, inklui prosesu reforma institusionál hirak ne’ebé hala’o daudaun.
Totál orsamentu tinan ne’e, fahe ba kategoria saláriu no vensimentu millaun $206,8, bens no servisu millaun $496,7, tranferénsia públika millaun $571,1, kapitál menór millaun $8,9, akapitál dezenvolvimentu millaun $213,4.
Orsamentu 2020 maihosi reseita doméstika millaun $172,3, hosi Rendimentu Sustentável Estimadu (RSE) millaun $544,3 sai millaun $316,6, tanba osan la to’o (défise) foti exesu hosi fundu mina-rai millaun $477 liu RSE, no totál levantamentu hosi fundu mina-rai hamutuk billaun $1,011.3.
Entretantu, OJE 2020 ne’ebé promulgadu ona, engloba ona gastu Dotasaun Orsamentu Temporáriu (DOT) durante fulan-10 nian.
Jornalista: Florêncio Miranda Ximenes
Editora: Julia Chatarina
