Xanana hala’o “check up” saúde ho susesu

DILI, 21 novembru 2020 (TATOLI) –Ekipa espesialista médiku hosi Ospitál Gatot Soebroto, Jakarta-Indonézia, ho susesu halo tratamentu saúde (check up)  ba lider karizmátiku Timor-Leste, Kay Rala Xanana Gusmão.

Notísia Relevante : Xanana Gusmão hala’o “check up” iha Jakarta

Ekipa espesialista ne’ebé fó konsulta ba Xanana Gusmão, eis Prezidente Repúblika Timor-Leste ne’e, lidera diretamente hosi Ministru Saúde Indonézia nian,  doutór Terawan Agus Putranto, nu’udar mós eis jenerál (purnawirawan) Tentara Nasionál Indonézia (TNI).

Komunikadu imprensa ne’ebé Agência Tatoli asesu hosi mídia CNRT relata katak prezidente partidu CNRT, Kay Rala Xanana Gusmão, remata ona prosesu tratamentu saúde  no ekipa médiku espesialista foti konkluzaun katak saúde Xanana Gusmão nian estavel hela, laiha moras boot ruma.

Kay Rala Xanana Gusmão iha oportunidade ne’e fó ninia agradesimentu boot ba doutór  Terawan ho ekipa espesialista-sira ne’ebé mak konsege ultrapasa prosesu “check up” ho susesu.

Hafoin check up, ekipa médiku-sira  transfere kedas Xanana ba iha sala pesoál ne’ebé importante tebes (VVIP/very-very important person) hodi almosu no deskansa atu haree progresu ba rekuperasaun saúde.

Tuir rekizitu protokolu jerál Ministériu Saúde Indonézia nian, pesoál ka ema ne’ebé bele hetan fasilidade tratamentu saúde ho kategoria VVIP  ba ema ne’ebé konsidera importante liu, hanesan prezidente repúblika ho fasilidade tratamentu ne’ebé kompletu no estraordináriu.

Ba kategoria VIP (very important person), Ministériu Saúde Indonézia fó importánsia ba governadór-sira no mós ba ema ne’ebé iha osan (rikasu) tanba konsidera ninia atendimentu kompletu mós no fasilidade karun.

Iha biban ne’e, Xanana Gusmão hakarak fó nia agradesimentu boot tebes ba povu Timor-Leste tomak nia orasaun hodi tulun ninia prosesu check up  iha Jakarta la’o ho di’ak, susesu no rekoopera hikas nia saúde.

Jornalista      : Domingos Piedade 

Editór             : Francisco Simões