DILI, 23 novembru 2020 (TATOLI)—Diretór Jerál Ensinu Sekundária Ministériu Edukasaun Juventude no Desportu (MEJD), Deolindo da Cruz, hateten estudante finalista na’in 30 husi Eskola Ensinu Jerál Taur Matan Ruak Baucau segunda ne’e, tuir ona ezame nasionál (EN) faze daruak.
“Ezame nasionál segundu xamada ba estudante na’in 30 husi eskola ne’e realiza segunda loron 23 no ramata iha 25 fulan-novembru 2020,” nia informa ba Tatoli, via telefone, segunda ne’e.
Notísia Relevante MEJD sei fó oportunidade ba estudante na’in 30 iha Baucau tuir EN
Estudante finalista na’in 30 ne’e la konsege tuir ezame nasionál no lokál komesa tinan 2019 tanba eskola refere seidauk hetan akreditasaun husi Ministériu Edukasaun Juventude no Desportu (MEJD).
Entretantu, antes ne’e Ministru Edukasaun Juventude no Desportu (MEJD), Armindo Maia fó orientasaun ba diretór munisípiu Baucau atu prosesa dadus estudante hirak ne’e hodi partisipa iha Ezame Nasionál tanba iha tinan 2019 liubá la hetan autorizasaun husi Governu tanba eskola ne’e taka tiha.
“Ita buka rezolve ho intensaun atu salva destinu estudante finalista na’in 30 ne’ebé tinan kotuk la hetan diretu iha ezame nasionál, depois mak ita sei foti medida, naran katak sira tuir uluk lai ezame nasionál. Tanba, ita lakohi prejudika estudante sira ninia futuru,” nia informa ba jornalista sira iha Eskola Sekundária Sagradu Coração de Jesus Becora, Segunda ne’e.
Nia konsidera estudante sira ne’e, sai vítima ba interese pesoál husi dirijente eskola sira nian, tanba ne’e, Governu liuhusi desizaun MEJD hatun ona despaixu ida hodi taka ofisialmente eskola ne’e.
“Ha’u fó ona orientasaun atu prosesa estudante sira ne’e, nune’e integra iha eskola ne’ebé de’it atu sira bele tuir fali ezame nasionál,” tenik Ministru Armindo.
Notísia Relevante Estudante finalista ESG na’in 20.145 sei tuir ezame nasionál
Jornalista: Tomé Amado
Editór: Agapito dos Santos
