Família afetadu 1891 sei simu apoiu rekuperasaun

DILI, 23 novembru 2020 (TATOLI)-Sekretáriu Estadu Protesaun Sivíl (SEPS), Joaquin José Gusmão dos Reis Martins, informa SEPS sei halo distribuisaun apoiu rekuperasaun ba material konstrusaun no orsamentu mão de obra ba família afetadu dezastre natural hamutuk 1891 iha territóriu.
Notísia Relevante : Orsamentu 2021: SEPS husu adisionál apoiu vítima dezastre naturál
Ba jornalista, ohin, iha edifísiu SEPS, Caicoli, Sekretáriu Estadu Joaquin Gusmão, hateten família vítima-sira ne’e sai afetadu ba anin sobu no inundasaun hodi estraga sira-nia hela fatin ka uma hahú 2019-2020.
Nia informa, tuir dadus família 1891 ne’ebé ekipa Sekretária Estadu Protesaun Sivíl sei tun ba terrenu iha aban hodi hahú halo distribuisaun apoiu ba komunidade afetadu iha munisípiu hotu, la inklui Oe-cusse.
Nia hateten, apoiu Governu nian ne’e hodi bele hakmaan komunidade-sira hadi’a fila-fali sira-nia uma ne’ebé hetan estragu no sei simu tuir tipu estragu hanesan estragu natoon, kaman ho aat totál sei la hanesan.
SEPS rasik aloka orsamentu $470,694.00 hodi responde ba apoiu rekuperasaun ba família afetadu hamutuk 1891.
Jornalista : Nelson de Sousa
Editór : Francisco Simões

