NASIONÁL, DILI, HEADLINE, POLÍTIKA

MNEK husu Embaixadór Ilídio simu kritika ho fuan boot

MNEK husu Embaixadór Ilídio simu kritika ho fuan boot

Ministra Negósiu Estranjeiru no Kooperasaun, Adaljiza Albertina Xavier Reis Magno. Imajen Tatoli/Egas Cristovão

DILI, 25 novembru 2020 (TATOLI) – Ministra Negósiu Estranjeiru no Kooperasaun (MNEK), Adaljiza Albertina Xavier Reis Magno, husu ba Embaixadór Timor-Leste ba Japaun, Ilídio Ximenes, atu fuan boot simu kritika hirak ne’ebé membru Bankada FRETILIN  halo hasoru nia.

Notísia Relevante : Bankada FRETILIN ezije atu ezonera Embaixadór Ilídio Ximenes

“Kritika-sira ne’e hosi deputadu-sira ba embaixadór tenke laran luak hodi simu. Nia mak publika  buat-sira iha Facebook hodi halo deputadu-sira kritika, entaun nia iha responsabilidade para hatán kritika-sira ne’e,” Ministra Adaljiza Magno hateten ba Jornalista-sira, ohin, iha Palaçio do Governo, Dili.

Tuir Ministra Adaljiza Magno nia haree laiha problema kona-ba publikasaun ne’ebé embaixadór Ilídio tau iha nia konta Facebook kona-ba atividade lider karizmátiku Kay Rala Xanana Gusmão nian hodi sai oradór iha eventu importante balun iha Japaun liuhosi gravasaun video.

“Laiha problema kona-ba nia publikasaun iha Facebook.  Nia halo promosaun ba lider másimu ida. Agora nia mak tenke sukat sensibilidade polítika oinsá. Nia embaixadór tenke defende ema hotu-hotu hanesan Estadu nian hotu, nia tenke publika iguál ba lider hotu ba asuntu Estadu nian,”  Adaljiza Magno hateten.

Kona-ba karta ne’ebé konvida pesoa eminente g7+, Kay Rala Xanana Gusmão, Ministra Adaljiza Magno, konfirma katak nia simu duni informasaun hosi tékniku sira iha duni konvite ba lider karizmátiku Kay Rala Xanana Gusmão. Maibé,  kona-ba pedidu ezonerasaun ba Embaixadór Ilídio hosi Bankada FRETILIN nian,  Ministra Adaljiza Magno dehan, nia seidauk simu karta ruma hosi Parlamentu Nasionál no parte seluk.

Notísia Relevante :Ilídio Ximenes: “Ha’u reprezenta Estadu la’ós halo servisu partidu nian” 

Jornalista   : Hortencio Sanchez

Editór        : Francisco Simões

iklan
iklan

Leave a Reply

iklan
error: Content is protected !!