DILI, 25 novembru 2020 (TATOLI)—Ekipa Tatoli feminina hela tan pasu ida de’it ona atu konkista vitória hanesan “eroina” iha lala’ok torneiu Futeból salaun (Futsal) Ministériu Asuntu Parlamentár no Komunikasaun Sosiál (MAPKOMS).
Notísia Relevante : Torneiu futsal MAPKOMS, TATOLI feminina “hakoi” esperansa Lafaek News 3-0
Liuhosi jogu ho ekipa feminina Naunil Media iha kampu Futsal, Bebora, Dili, ohin, ekipa feminina Tatoli hatudu ninia “ambisaun” boot no enérjiku tenke manan jogu ida-ne’e hodi ultrapasa ba final.
Ikus mai “ambisaun” boot ne’e sai realidade hodi manan duni Naunil Media liuhosi suta penalidade tanba to’o jogu termina iha minutu ikus liu Naunil Media ho Tatoli fahe pontu hanesan 2-2.
Hosi rezultadu penalidade, dewi fortuna pertense liubá ekipa Tatoli liuhosi guarda rede Imelda F ne’ebé salva bola-rua ne’ebé suta hosi jogadora Naunil, Juliana Muky (5) ho Imaculada Ribeiro (9).
Hosi suta penalidade Naunil Media nian, úniku jogadora Bealantina Pinto (11) mesak mak konsege suta golu. Enkuantu jogadora Tatoli nian na’in-tolu, suta golu hotu kedas, hodi nune’e, hatuur score 5-3.
Jogadora hirak ne’ebé hatama golu iha penalidade hodi lori Tatoli ba final maka Ofelia Morreira (8), Flicidade Ximenes (9) ho Maria Auxiliadora (7).
Jornalista : Hortencio Sanchez
Editór : Francisco Simões
