MAUBARA, 26 novembru 2020 (TATOLI)—Xefe Suku Vatubou Postu Administrativu Maubara Munisípiu Liquiça, Gabriela da Costa Pereira, preokupa ho kondisaun estrada ne’ebé liga ninia suku ho postu administrativu tanba sei kontinua aat hahú kedas okupasaun Indonézia to’o ohin loron.
Suku Vatuvou iha aldeia 10 maka Gariana, Ubucaiti, Raime, Lisaico, Maúbo, Manuquibia, Bouralivei, Lisalara, Samanaru no Vatunau ho totál abintante 600-resin ho xefe família 200-resin.
Notísia Relevante :“Ami-nia Estrada Aat Tebes, Piór Liu Tempu Udan”
Iha tempu udan, nia dehan komunidade labele lori sira-nia produtu ba faan iha merkadu tanba kondisaun estrada aat difikulta operasaun transporte públiku atu tula pasajeiru sira.
“Komunidade husi Gariana lori produtu ba merkadu Maubara la’o killometru 15, liga fali ba iha suku Lisalara lori produtu ba merkadu killometru 12, Aldeia maúbu ba Maubara killometru 8, ida ne’e mak difikulta tebes ba ami-nia komunidade bainhira tempu udan susar atu faan produtu sira nebe mak ami iha,’’ nia informa asuntu ne’e ba Tatoli, via telefone,kinta ne’e.
Tanba ne’e, Autoridade Lokál Suku ne’ebá husu ba Ministériu Obra Públika (MOP) atu tau iha Orsamentu Jerál Estadu kada tinan, liuhosi projetu estrada rurál nune’e bele konstrui estrada ba populasaun iha suku ne’ebá.
Notísia Relevante :Kondisaun Estrada Nahareka Aat
Jornalista : Felicidade Ximenes
Editór Agapito dos Santos
