DILI, 08 janeiru 2021 (TATOLI)—Empreza Santos hanesan operadór joint Venture iha kampu petrolíferu Bayu-udan, iha kinta (07/01) anunsia ona desizaun investimentu finál ho montante millaun $235 ba projetu perfurasaun mina-matan tolu iha Bayu-undan.
Projetu ne’e ho previzaun sei estende tan durasaun operasaun iha kampu petrolíferu to’o tinan 2023, otimiza rekuperasaun kampu no fornese valór signifikante ba Timor-Leste, liuhosi produsaun ba instalasaun offshore no planta Darwin LNG.
“Liuhosi relasaun traballu di’ak no konstrutiva entre Governu Timor-Leste ho ami-nia parseiru joint venture, maka ami bele avansa lalais ba objetivu komum hodi masimiza valór kampu Bayu-undan,” Diretór Ezekutivu Santos, Kevin Gallaghe, dehan liuhosi nota ne’ebé Agência TATOLI asesu iha sesta ne’e.
Notísia Relevante: Governu aprova ona proposta Santos fura mina-matan tolu iha Bayu-undan
Programa perfurasaun ne’e kompostu husi postu produsaun tolu hanesan rua iha plataforma rai maran no ida iha tasi okos, hodi dezenvolve rezerva adisional gás naturál no líkidu hodi estende durasaun tempu kampu.
Aprovasaun ba projetu ne’e menus husi fulan-hitu, hafoin empreza Santos ofisiálmente sai operadór no parseiru iha kampu iha Bayu-undan hafoin finaliza sosa asaun ativa ConocoPhillips iha Norte Austrália no Timor-Leste.
Posu hirak ne’e sei fura ho plataforma Jack-up Noble Tom Prosser, ne’ebé tuir planu sei realiza iha trimestre daruak tinan ne’e hodi fó produsaun iha trimestre tuir mai tinan ne’e.
“Programa perfurasaun ne’e ho previzaun sei hetan millaun $20 barríl resin, ne’ebé hanesan rezerva bruto óleo no produsaun kustu fornesimentu kiik, estensaun durasaun útil Bayu-undan, redús períodu Darwin LNG, antes projetu Barossa hahú halo operasaun,” Kevin Gallaghe esplika.
Daudaun, empreza Santos iha partisipasaun no operasaun 68,4% iha kampu Bayu-undan no Darwin LNG sei redús ba 43,4%, hafoin konlusaun fa’an 25% ba SK E&S.
“Konkluzaun fa’an interese ba SK E&S agora la’o ho di’ak ho konsentimentu husi Bayu-undan/parseiru DLNG no regulamentu Timor-Leste ne’ebé simu ona molok tama Natal no tinan foun iha tinan kotuk, ne’ebé ami sei prosesu ho aprovasaun regulamentu Asutrália nian. Prosesu akizisaun sei konklui hafoin desizaun finál investimentu Barossa 1H 2021,” Kevin Gallagher akresenta.
Iha loron 28 maiu 2020, Conocophillips finaliza ona prosesu fa’an ativu petrolífera ba empreza petrolífera australiana, Santos Limited, ne’ebé lokaliza iha Norte Austrália.
Durante ne’e, projetu Bayu-undan kontribui ona reseita ba Estadu Timor-Leste, ba fundu mina-rai hamutuk biliaun $20 resin.
Jornalista: Florêncio Miranda Ximenes
Editora: Julia Chatarina
