DILI, 11 janeiru 2021 (TATOLI)–Operadór modalidade jogu slot machine balun ne’ebé hetan lisensa ona hosi Governu, balun la kumpre Diploma Ministeriál, Ministériu Turizmu Komérsiu no Indústria (MTKI) Nú.3/2019, 06 fevereiru, liuliu iha artigu 3 kona-ba rekizitu no artigu 4 kona-ba kapitál iha konta bankária.
Tuir publikasaun Jornál da República, série I. nú.5, edisaun kinta-feira 06 fevereiru 2019, Diploma Ministeriál, Nú.3/2019, 06 fevereiru, artigu 3 kona-ba rekizitu ba modalidade jogu slot machine, katak sosiedade komersiál ne’ebé tuir konkursu públiku, atu manan tenke iha garantia kapitál investimentu mínimu $10,000,000 iha banku komersiál sira iha Timor-Leste.
Iha artigu 4 kona-ba saldo iha konta bankária kontempla dehan, sosiedade ne’ebé kumpre artigu 3 haktuir ba Diploma Ministeriál, aleinde kapitál investimentu mínimu referidu ba artigu anterior (3, red) tenke iha tan saldo operasionál iha konta bankária permanente la bele menus hosi $1,000,000.
Notísia Relevante: Inspetór Jogu husu operadór slot machine kumpre regra saúde públika
Hatán ba preokupasaun ida-ne’e, Inspetór Jerál Jogu, Domingos da Costa Guterres, dehan bainhira nia asume kargu atuál, foin purvolta fulan-haat, nia konsulta ho tékniku sira iha Inspesaun Jerál ba Jogu sira (IGJ, sigla portugés) hateten katak, operadór sira ne’ebé hetan lisensa ba modalidade jogu mákina (slot machine) kumpre duni rekizitu sira-ne’e tuir Diploma Ministeriál MTKI.
“Hafoin ha’u mai iha ne’e, ha’u konsulta ho ha’u nia tékniku sira iha ne’e dehan katak operadór sira ne’ebé eziste iha modalidade jogu slot machine kumpre duni rekizitu sira-ne’e no tuir konkursu públiku, maski ha’u mós rona iha balun hetan adjudikasaun direita tanba konfiansa polítika,” Inspetór Jerál Jogu informa ba Agência TATOLI iha ninia knaar fatin, edifísiu IGJ, Bebora, Dili, sesta (08/01).
Daudaun IGJ sei halo fiskalizasaun ida ba operadór sira hodi konfirma garantia bankária ne’e tau duni iha banku Timór ne’ebé Jornal da Repúblika série II, Nú.17A, edisaun Sesta-feira, 27 abríl 2018, publika despaixu hosi MTKI Nú.007/MT/IV/2018, kona-ba regulamentasaun atividade jogu, iha númeru 1 mensiona katak entidade konsesionária hotu ka lisensiada ba atividade jogu sosiál no slot machine, tenke iha únika konta bankária ba jestaun operasionál iha Banku Nasionál Komérsiu Timor-Leste (BNCTL, sigla portugés).
“Agora daudaun iha polítika VIII Governu, liuhosi MTKI, Ministru orienta no asina ona akordu ida ho BNCTL, atu osan garantia jogu transfere hotu ba Banku Komérsiu ne’e atu fasil halo kontrola,” haktuir Domingos Guterres.
Iha tempu badak, Inspetór Jogu sei halo fiskalizasaun ba operadór sira ne’ebé iha, hodi konfirma kontratu tomak no prosedimentu sira hodi verifika didi’ak atubele sai hanesan.
“Se balun karik iha adjudikasaun direita mós tenke tuir nia prosedimentu Dekretu-Lei no Diploma Ministeriál atubele sai sasukat, tanba ita ko’alia kona-ba jogu, ita tenke haree didi’ak atubele organiza ho didi’ak hodi fó reseita di’ak ba Estadu,” nia afirma.
La kumpre despaixu MTKI aplika koima
Bainhira halo fiskalizasaun maka IGJ hetan operadór jogu sira la kumpre rekizitu sira tuir despaixu MTKI, maka tenke toma medida ho rigór no aplika koima.
“IGJ la iha família no la iha kontamina polítika bainhira hala’o knaar profisionál, ami hakarak serbisu profisionál. Bainhira ita ko’alia kona-ba inspesaun, tenke iha transparénsia ho sentidu katak la haree ba se de’it. Kuandu sala, ita dehan sala. Ami-nia serbisu rutina nian mak inspesaun ne’ebé dehan kompañia se de’it mak komete infrasaun, ami prega kedas koima,” Domingos hateten.
Notísia Relevante: Tinan 2020, IGJ kontribui reseita millaun $1,4 ba kofre Estadu
Nia konta tuir katak, durante asume knaar hanesan Inspetór Jogu, nia aplika ona koima ba kompañia lotaria Rudal ne’ebé mak komete infrasaun, maski ho montante ki’ik.
“Ha’u la tolera. Se agora mak ami hetan, tantu iha slot machine, ami sei foti medida no fó koima. Dala-ruma dehan, Timór mesak kolega de’it, maibé ita ko’alia kona-ba lei ne’e matan delek, tanba ne’e hotu-hotu tenke kumpre, kuandu la kumpre ami tenke foti medida,” nia subliña.
Ba kompañia sira ne’ebé hetan lisensa tenke selu taxa no iha lei hateten dehan loron-lima nia laran, kompañia tenke selu taxa, maibé liu ida-ne’e lei hateten IGJ presiza notifika atubele selu koima.
“Ne’e tenke rigór. Selu koima administrativa ho montante ki’ik liu mak $500 to’o $10,000 no ida-ne’ebé komete infrasaun boot, ami aplika koima tuir lei, hosi $10,000 to’o $20,000. Se mak sala, kontra lei ka la iha autorizasaun hosi IGJ, tenke prega multa,” nia akresenta.
Iha publikasaun Jornal da República nian, 27 abríl 2018, operadór jogu slot machine ne’ebé hetan lisensa iha neen, maibé realidade operadór rua de’it mak kumpre sira-nia obrigasaun selu taxa 25% ba Estadu tuir relatóriu IGJ nian iha tinan 2020.
Operadór rua maka MTG Holding, S.A, ne’ebé selu taxa montante $413,774.23 ho Timor Holding, Lda, $401,790.20.
Tuir Domingos da Costa, operadór jogu seluk, relata informasaun katak altura ne’ebá sira hirak ne’e tuir hotu konkursu públiku, maibé sira la prienxe rekizitu, entaun ida-ne’e mak sira la bele tama iha prosesu implementasaun jogu ne’e.
Operadór seluk ne’ebé la tama prosesu implementasaun jogu mak hanesan, Express Infra Timor, Lda, Hamatomo Rakuun, S.A, Ilimano Holding, S.A, no Omega Grande Fortuna, Lda.
“Hafoin ha’u mai asume kargu ne’e atu besik fulan-haat, ha’u husu ba tékniku sira katak, operadór MTG Holding no Timor Holding, prienxe rekizitu maibé momentu ne’e, ha’u mós buka hela informasaun hotu atu konfirma sira prienxe duni rekizitu ne’e ho loloos ka lae?,” nia hatutan.
Oportunidade ne’e, nia afirma tan, Timor-Leste bele rejista jogu barak, maibé timor-oan tenke livre hosi jogu, ho sentidu katak operadór ne’ebé loke jogu ba futuru sira-ne’e tenke hatama osan no lori tama osan hosi nasaun seluk mai Timór, la’ós lori sai osan hosi Timór ba li’ur, tanba ne’e tenke iha baze indústria jogu atu ema joga ne’e bele mai hosi nasaun seluk lori osan mai.
Timor Holding loke tanba manan konkursu públiku
Hosi sorin seluk, Agência TATOLI konfirma Diretór Timor Holding, S.A, Lourenço de Oliveira, hateten, operadór ne’e hala’o atividade jogu slot machine tanba tuir konkursu públiku.
“Kompañia Timor Holding tuir konkursu públiku iha tinan 2015 ho kompañia lubuk ida, no ami sai hanesan primeira klasifikadu no mós prienxe rekizitu ne’ebé mak hatuur iha Lei no Dekretu-Governu. Ezemplu, tenke iha garantia $10,000,000 iha banku atubele garantia kompañia iha osan selu ema manan no garante sei bele halo investimentu otél no ami mós iha esperiénsia,” Lourenço Oliveira, hateten segunda ne’e iha ninia knaar fatin, Dili.
Atuál Diretór Aero Dili ne’e dehan, maski hetan primeira klasifikasaun iha konkursu públiku ba atividade jogu slot machine, maibé nia triste tanba ho situasaun atuál halo Timor Holding, Lda, seidauk bele implementa rekizitu balun.
“Triste oituan bainhira ita enfrenta impase polítika mai tan ho COVID-19, ami seidauk bele hala’o kompromisu balun ho Governu atu halo investimentu otél. Rai mós ami sosa ektare rua no dezeñu ba otél halo hotu ona, maibé seidauk bele konstrui otél tanba situasaun pandemia seidauk bele fó espasu ba ami halo serbisu,” Lourenço de Oliveira tenik.
Nia mós triste liután tanba tinan 2020 la bele halo taxa ba Governu ho montante $2,000,000, hanesan tinan sira liubá.
“Tanba rendimentu menus no monu, ami tenke taka andár ida tanba nia kustu boot liu fali nia rendimentu. Ita husu atu COVID-19 ne’e liu lalais atu ita komesa book otél tuir Timor Holding nia kompromisu ho Governu,” nia akresenta.
Reseita anuál 2020 hosi jogu slot machine
Tuir dadus, reseita anuáll 2020 hosi atividade slot machine ne’ebé IGJ hetan no kontribui ba reseita Estadu hosi empreza Timor Holding, tuir obrigasaun taxa 25% ho montante $401,790.20, ho reseita brutu $84,398,842.6, prémiu (ema kona/manan) $82,805,265.7, reseita líkida $1,607,160.81, kontribuisaun sosiál 25% x reseita líkida $401,790.20.
Empreza MTG Holding, iha tinan 2020, selu taxa obrigasaun 25% ba Estadu ho montante $413,774.23, reseita brutu $17,226,410.0, prémiu (ema kona/manan) $15,611,313.1, reseita líkida $1,655,096.90 no kontribuisaun sosiál 25% x reseita líkida $413,774.23.
Jornalista: Francisco Simões
Editora: Julia Chatarina
