SSB laiha espasu aplika distansiamentu sosiál
DILI,12 janeiru 2021 (TATOLI)—Servisu triazén iha Sentru Saúde Becora (SSB) enfrenta difikuldade boot ba aplikasaun distansiamentu sosiál tanba fatin kloot.
“Estadu emerjénsia da-ualu fatin triazén sei preparadu, maibé agora Estadu Emerjénsia dasiak fatin la permite atu halo distansiamentu sosiál liliu ba triazén, screening no lona ne’ebé prepara atu halo atendimentu ba komunidade durante ne’e at hotu ona,” Xefe Sentru Saúde, Adelina Pinto, informa ba jornalista sira, iha ninia servisu fatin tersa ne’e, iha Becora.
Notísia Relevante:Sentru Saúde Becora Kontinua Implementa Sistema Triajén ba Pasiente
Nia parte hato’o ona problema ne’e ba Serbisu Saúde Munisípiu Dili, maibé seidauk hetan resposta hodi rezolve.
“Agora daudaun ami-nia serbisu mak bainhira pasiente sira mai, ami orienta de’it atu fase liman no uza maskára. Ida ne’e mak ami bele aplika, maibé kona-ba distansiamentu sosiál defisil atu ami aplika tanba fatin la permite,’’ Xefi Sentru Saúde ne’e esplika.
Kona-ba servisu triazén ne’e la’o hela, maibé distansiamentu sosiál mak laiha tanba Sentru Saúde ne’e laiha espasu sufisiente hodi implementa distansiamentu fiziku no sosiál.
Jornalista:Felicidade Ximenes
Editór: Agapito dos Santos
