DILI,15 janeiru 2021 (TATOLI)—Ekipa junta-médiku Ospitál Nasionál Guido Valadares (HNGV-sigla portuges), sujere ba Governu atu investe makaas ba ospitál nasionál hodi hasa’e prestasaun servisu liliu fó tratamentu ba pasiente ho moras oioin ho kualidade.
“Sujere ba Governu liliu Ministériu Saúde, diak liu investe rasik iha rai laran, hasa’e Ospitál Nasionál Guido Valadares ninia kapasidade tratamentu, investe iha ekipamentu, rekursu umanu no fasilidade, nune’e tempu emerjénsia hanesan COVID-19, ita la presiza haruka pasiente ba halo tratamentu saúde iha rai-liur,’’ Prezidente Ekipa Junta-médika HNGV, Mateus Pinheiro, hateten ba jornalista sira iha HNGV, sesta ne’e.
Notísia Relevante:MS Aloka Osan Millaun Hitu Transfere Moras ba Rai-Liur Kada Tinan
Nia dehan ho kondisaun ospitál nian agora susar atu fó atendimentu ba pasiente sira ho moras komplikadu sira hanesan kardióku ka kurasaun, kankru, fase ran no seluk tan.
“Investe tiha iha rai-laran, haruka espesialista sira ba kontinua estudu no haruka ema seluk mai fó tratamentu, depois kontinua hanorin médiku Timoroan sira to’o tempu bele hamrik mesak,” nia sujere.
Bainhira investe tiha rai laran, tenke haruka ema ba eskola, no haruka ema seluk mai halo tratamentu depois hanorin povu to’o tinan-lima bele ona no servisu mesak se ita presiza buat balun ne’ebé mak avansadu.
“Ita bele kontaktu sira mai ajuda , maibé ida ne’ebé mak natoon ita bele tratamentu mesak tanba ne’e mak tenki investe ba rekursu umanus no infraestutura,’’ Mateus Pinheiro, esplika.
Notísia Relevante:HNGV planea sei hari’i sala VIP foun
Jornalista: Felicidade Ximenes
Editór: Agapito dos Santos
