DILI, 19 janeiru 2020 (TATOLI)–Reprezentante povu iha uma fukun Parlamentu Nasionál (PN), fó hanoin ba Ministériu Edukasaun, Juventude no Desportu (MEJD) atu hamosu lei hodi nune’e define uniformidade (farda) ba estudante sira, hahú hosi ensinu primária to’o sekundária.
“Farda eskola nível nasionál seidauk iha tanba ita ukun-aan tinan 20-resin maibé hosi Ministériu Edukasaun seidauk halo lei ka regulamentu ruma oinsá regula uniformidade nasionál, hahú hosi eskola primária to’o sekundária. Tanba, durante ne’e, simu lamentasaun barak hosi inan-aman sira tenke suku farda kada tinan, ho razaun diretór eskola sira halo farda hanesan projetu,” Membru Bankada Partidu Libertasaun Nasionál (PLP), Deputada Domingas dos Santos, levanta liuhosi plenária Parlamentu Nasionál, tersa ne’e.
Deputada ne’ebé substitui provizóriu Deputadu Sabino Guntur ne’e fundamenta, iha inan no aman iha oan liu na’in-haat no na’in-lima, bainhira bin ka maun pasa ona ba ensinu pre-sekundária, alin atu uza fali farda ne’e labele ona tanba mestre sira orienta suku fali farda foun.
“Ne’e halo inan aman sira-ne’ebé ekonomia la sufisiente lamenta tebes. Aat liután, farda sira-ne’e la suku iha ita-nia rai-laran maibé ba suku hotu iha Indonézia,” Deputada Domingas dos Santos subliña.
Nia hatutan, bainhira farda ne’e mai balun la aserta ba labarik sira entaun obriga inan aman sira tenke suku farda foun.
“Iha rai laran iha alfaiate sufisiente atu suku farda ne’e,” nia dehan.
Deputada Bankada PLP ne’e fó hanoin ba Governu atu hamosu ona lei ruma hodi prodús uniformidade nasionál ba eskola hotu-hotu.
Hatán ba preokupasaun ne’e, Ministru ba Asuntu Parlamentár no Komunikasaun, Francisco Jerónimo, sei enkamiña ideia ne’e ba ministériu relevante.
Jornalista: Evaristo Soares Martins
Editór: Cancio Ximenes
