Governu deside envolve foos importasaun iha Cesta Bázika
DILI, 25 janeiru 2021 (TATOLI)–Ministru Koordenadór Asuntu Ekonómiku (MKAE), Joaquim Amaral konsidera laiha problema bainhira Governu deside envolve foos importasaun iha produtu Cesta bázika.
Tuir governante ne’e katak iha dekretu lei Governu nian ne’ebé mak antes ne’e Konsellu Ministru aprova ne’e la bandu foos importasaun tama iha produtu Cesta Bázika.
“Lae! Dekretu lei iha lista hakerek momoos foos mutin. Foos mutin bele mai hosi rai-laran no bele mai hosi rai-li’ur,” Joaquim Amaral ba jornalista sira iha salaun João Paulo II, Comoro, Dili, segunda ne’e.
Nia dehan, programa Cesta Bázika nu’udar programa hola parte iha rekooperasaun ekonómika nian atu insentiva agrikultór sira.
“Iha faze sira ne’ebé ita introdúz husi novembru to’o janeiru, ita fó preferénsia boot liu atubele sosa foos ne’ebé prodúz iha ita-nia rai para ita aproveita barak liu ho másimu foos ne’ebé mak prodúz husi ita-nia agrikultór sira. Maibé, bainhira situasaun ne’e la’o, to’o iha janeiru, ita haree katak foos rai komesa menus,” nia haktuir.
“Se ita hein ema to’o kuda tan fali, konserteza programa Cesta Bázika ne’e to’o nia tempu hotu mós programa ne’e seidauk hotu,” Joaquim hatutan.
Ezekutivu ne’e tenik, nia parte hasai ona despaisu iha semana kotuk hodi fó autorizasaun foos imporasaun bele involve iha produtu Cesta Bázika.
“Semana kotuk despaisu ministeriál sai tiha ona, atu uza foos importasaun ho ninia tabela presu sira,” Joaquim katak.
Jornalista: Natalino Costa
Editór: Xisto Freitas
